By Wendy Tibe
Isimangaliso esimnandi sajika saba muncu kubafundi besikolo samabanga aphantsi abayi-47 eHammanskraal, eTshwane, xa bagula emva kokutya iitshokolethi eziphelelwe lixesha.
Esi sehlo, esenzeke ngoMvulo, sishiye uluntu lungcangcazela kwaye siqaqambisa ukubaluleka kokujonga imihla yokuphelelwa kokutya.
Abafundi bebanga lesihlanu (5), abaphakathi kweminyaka elithoba (9) neshumi elinesine (14) ubudala, baseNew Eersterust, banyangelwe imiba yesisu emva kokutya iitshokolethi ezithengwe komnye umfundi. Iitshokholethi, ezazinomhla wokuphelelwa kukaJuni ka-2024, kukholelwa ukuba zingunobangela wesiganeko sokutyhefwa kokutya.
NgokweSebe lezeMpilo, uninzi lwabantwana abachaphazelekayo baye bafumana unyango kwaye bakhululwa. Nangona kunjalo, abantwana abane bashiyeka esibhedlele ukusukela emva kwemini ngoLwesibini umhla weshumi elinesihlanu (15), befumana unyango olongezelelweyo.
Isithethi seSebe lezeMpilo eRhawutini, uMotalatale Modiba, ulumkise uluntu malunga nobungozi bokutya ukutya okuphelelwe lixesha.
“Kubalulekile ukujonga imihla yokuphelelwa kweemveliso zokutya, nokuba zinokujongeka kwaye zivumba kakuhle. Ukutya okuphelelwe lixesha kunokuba yingozi kwimpilo yethu, kwaye kule meko, kukhokelele ekuguleni kwabantwana abangamashumi amane anesixhenxe (47),” utshilo uModiba.
Esi siganeko sisebenza njengesikhumbuzo kubazali, abanonopheli, kunye nabathengisi ukubeka phambili ukhuseleko lokutya. Kubalulekile ukuqinisekisa ukuba iimveliso zokutya ziyagcinwa kwaye ziphathwa ngokufanelekileyo ukuthintela ukonakala kunye nongcoliseko.
Okwangoku, uphando luyaqhubeka ukufumanisa ukuba iitshokolethi eziphelelwe lixesha zathengiswa njani kubafundi kunye nokuchonga amanyathelo okuthintela iziganeko ezifanayo kwixesha elizayo.
Njengoko abantwana abachaphazelekayo bechacha, uluntu luyadibana ukwazisa malunga nokhuseleko lokutya kunye nokubaluleka kokujonga imihla yokuphelelwa lixesha.