By Asemahle Mbete.
Ngokwengxelo ye Eyewitness, iKomishoni yoPhando kaJafta imamele ubungqina kowayesakuba yintloko yezokhuseleko kwiYunivesithi yaseWalter Sisulu uSibusiso Ngubane, ngoLwesine umhla weshumi elinanye (11) kweyoMsintsi 2025.
Le komishoni ihlola ukwenzakala nokubulawa kwabafundi beli ziko lemfundo eMpuma Koloni. Ekuqaleni kwalo nyaka, umfundi wadutyulwa wabhubha ngelixa omnye wonzakala ekhampasini. Inkampani kaNgubane, iMyaluza Security, nesele isusiwe kweli ziko, ibiphethe ezokhuseleko ngethuba kusenzeka ezi ziganeko.
Le komishini ibihleli eMhlanga, eThekwini.
Emva kwenyanga omnye umfundi uSisonke Mbolekwa wadutyulwa wabulawa ekhampasini ngethuba beqhankqalazela imeko embi yokuhlala kwiindawo ezihlala abafundi. Umanejala wendawo yokuhlala kweli ziko uManelisi Mampane ujongene netyala lokubulala uMbolekwa. Ikomishoni iphonononga iimeko ezijikeleze zombini ezi ziganeko.
UNgubane ungqinile ngeminye imiba edibene nokhuseleko lwakhe kweli ziko lemfundo kuquka nompu othe wafunyanwa.
Iinkqubo zimiselwe uLwesihlanu.