Amaqela ebhola ekhatywayo kwiDSTV Premiership eMzantsi ebedlala ngexesha elinye ngemini enye ukutsho oko ngoMgqibelo umhla weshumi elinesibhozo(18) kuCanzibe phezolo.
Isibhozo(8) imidlalo ebidlalwa izolo phantsi kwePSL, umdlalo ubuseKapa kumabala iAthlone iSundowns iyibethe okwesibini(2) imidlalo ilandelelana iStellenbosch kowayo ngethuba iyibetha ngenqaku elinye kwiqanda(1-0). IStellies asikakwazi ukuyibetha iMamelodi Sundowns.
IiBrazilians zophule irekhodi layo lamanqaku angamashumi asixhenxe ananye(71) nelasekwa ngumqeqeshi wabo uPitso Mosimane ngeseason ka2014/15. Kungoku nje uRhulani Mokwena wenze elitsha lamanqaku angamashumi asixhenxe anesibini(72) phambi kokuba kudlalwe umdlalo wokugqibela nto leyo enokuthetha ukuba ingalinyusa nangakumbi.
iPirates kwakhona ayikwazanga ukusebenzisa ithuba lokuya kuhlala kwindawo yesibini kuluhlu lamaqela ePSL. Ezimnyama ngenkani zibethwe ziRockets ngenqaku eqandeni(1-0). Akukho evume ukugoba uphondo phakathi kweChiefs nePolokwane City nezibambene ngeqanda macala(0-0).
ISupersport izibethele iSwallows ngamanqaku amabini eqandeni(2-0), lonto yenze ukuba Amatsantsantsa asePitoli ahlale kunjalo nje aqinisekise ngendawo kuluhlu lamaqela asibhozo wokuqala, Kwelinye icala yona iCape Town Spurs ibambene ngenqaku macala neGolden Arrows yabe yona ingazoku wenznto loo manqaku iUrban Warrious kuba sele yehlile, sele ingabadlali abazithengisa kwamanye amaqela akwiPSL.
ICape Town City ibhaxabule iRichards Bay ngamanqaku amathathu kwelinye(3-1). IRoyal AM ibambene ngeqanda macala(0-0) neChippa United.
Amazulu nawo angumceli mngeni kuluhlu lamaqela asibhozo(8) wokuqala emva kokubetha iSekhukhune United ngenqaku elinye eqandeni, iChiefs, iPolokwana City naAmazulu onke lamaqela ayalingana ngamanqaku angamashumi amathathu anesithandathu(36).
Ithuba lokugqibela kumaqela likwiveki ezayo xa kuzakube kudlalwa imidlalo yokugqibela yeDSTV Premiership.
By Siphiwo Boqwana