By Sipiwo Boqwana.
Bezime ngxi izitalato zaseMonti kuMasipala oMbaxa weBuffalo City kule mpelaveki siphuma kuyo ngoMgqibelo, umhla weshumi (10) kuCanzibe 2025, emva kokuphumelela kweqela lebhola ekhatywayo iKaizer Chiefs ngethuba iphumelela indebe yeNedbank kumabala aseDurban, eMoses Mabhida nalapho inkundla ibizele imi ngeembambo.
Amakhosi abethe iOrlando Pirates ngamanqaku amabini kwelinye (2-1) kumagqibela kankqoyi wendebe iKe Yona emva kweminyaka elishumi bengasayazi le nto kuthwa yindebe nantlobo kuzo. IChiefs igoduke nezigidi ezisixhenxe kule mpumelelo.
Ebethengiswe aphela amatikiti edabi laseSoweto nesele kubonakala ilidabi loMzantsi Afrika. Abadlali beqela leChiefs nabalandeli bayo bebexole ngaphakathi kumhlophe entliziyweni yile mpumelelo.
Ubungafunga uthi lo mdlalo wamaBhakabhaka naBafana bokuThula noXolo ubudlalelwa eBuffalo City ndlela le bekumnyama ngayo ngabantu bevale izitalato zaseMonti nakooMdantsane. Phantse lonke iMonti ibiyinkungu nelanga, ingumbo nomxesiba ezitalatweni iimoto bezixakane nobom, kodwa nangona kunjalo bekungekabikho ziganeko zihlasimlisayo ezithe zabikwa kulemibhiyozo yempumelelo yeChiefs.
Oosomashishini ingakumbi abeendawo zentselo benze ingeniso engumangaliso kunjalo nje bebenokuvuya bonwabe xa la maqela mabini enokuqubisana impelaveki zonke, kungenjalo qhoro xa kuphela inyanga ukutsho oko kanye nyanga nganye.