Kunjawe indoda yomlungu ngomhla wesithathu (03) kweyoMsinti 2025 emveni kokuba ixuthe umpu epoliseni ngethuba longquzulwano nayo. Oko kwenzeke kwidolophu yaseKapa, eNtshona Koloni.
Isithethi samapolisa eNtshona Koloni, uLieutanant Colonel Malcolm Pojie, uthi amapolisa afumene isikhalazo ngendoda ehama ngaze ecaleni kwendlela kwisitalato iKeerom, ngentsimbi yokuqala emini.
“Ekufikeni kwethu kwindawo yexhwayelo, amapolisa afumana ityendyana lomfana elihamba ngaze, alavumi ukuzigquma umzimba nokusebenzisana namapolisa.
UPojie uthi amapolisa amathathu akwazile ukumoyisa umrhanelwa, axutha umpu.
“Bambambe ngezityholo zokuphanga umpu, ukukhupha umpu kwindawo kawonke-wonke kunye nokuziphatha kakubi esidlangalaleni,” wongeze watsho uPojie.
Le ndoda kulindeleke ukuba ivele kwiNkundla kaMantyi yaseKapa kungekudala.