Indoda yaKwaNojoli, eyayifudula iyiSomerset East, etyholwa ngolwaphulo-mthetho ngokwesondo ebantwaneni, ifunyenwe inamatyala asixhenxe kwalishumi elinanye ebekwe wona.
ULukas Rudman oneminyaka engama-65 ubudala uya kugwetywa nge-23 kaJanuwari ka-2024.
Inkundla ephakamileyo yaseMpuma Koloni eMakhanda imfumene enamatyala amabini okudlwengula, amabini okuxhaphaza ngokwesondo namathathu okurhweba ngabantu ngokungekho mthethweni ngoLwesihlanu.
Noko kunjalo, uye wakhululwa kwamanye amatyala amane.
Urhulumente utyhola uRudman ngelithi uye walukuhla abamangali ukuba batyelele endlwini yakhe ngokubapha izipho eziquka imali, iiselfowuni, ukutya notywala.
Kwezinye iimeko, uye wanikezela ngotywala kwiintombi ezineminyaka ephakathi kwe-13 ne-18 ngexesha leziganeko.
Urhulumente ngaphambili wathi xa egwetyiwe, uzakufumana isigwebo sobomi entolongweni.