URhulumente wephondo leMpuma Kapa, phantsi kweNkulumbuso uLubabalo Oscar Mabuyane, uzibophelele ngelithi uzakuqubisana nomba wokungaqeshwa koogqirha abangaphangeliyo kweli phondo. Esi sibhengezo silandela indibano ebibanjwe ngomhla wamashumi amabini ananye kweyoMqungu ka-2025, phakathi kweNkulumbuso uMabuyane, uMlawuli Jikelele uMbulelo Sogoni, ibambela likaMphathiswa wezeMpilo uSibulele Ngongo, iinkokeli zeCOSATU, nabameli boogqirha abangaphangeliyo.
Ngexesha leengxoxo, iNkulumbuso iqinisekise abachaphazelekayo ukuba kukho amanyathelo asendleleni ukulungisa le nkxalabo.
“Kuza kuqeshwa oogqirha, kwaye sisebenza nzima ukusombulula le ngxaki. Ngeenjongo zokuqinisekisa ukuba izinto ziselubala, i-ofisi yam izakuqhubeka ihlaziya abachaphazelekayo kulo mba,” utshilo uMabuyane.
Nangona bezibophelele ekuphuculeni abasebenzi bezempilo, uMabuyane uyivumile imicelimngeni yemali elijongene nayo iSebe lezeMpilo. Ezi zithintelo zenze nzima inkqubo yokwandisa amathuba engqesho.
Nangona kunjalo, iNkulumbuso iyalele iSebe lezeMpilo leMpuma Kapa, likunye neOfisi yeNkulumbuso kunye noNondyebo wePhondo, ukuba bachonge izikhundla ezinokuzaliswa ngokweemfuno zephondo kunye nobukho bohlahlo lwabiwo-mali.
“Sizibophelele ekusebenzisaneni nabo bonke abachaphazelekayo ukulwa nemingeni yezempilo ejongene nephondo lethu. Ngokusebenzisana, singakwazi ukuqinisekisa ukuba abemi bethu bayafikelela kwiinkonzo zempilo ezisemgangathweni kwaye iphondo lethu linabasebenzi bezempilo abanezakhono elifunekayo ukuze liphumelele,” ugxininise watsho.
Urhulumente umisele umhla wokuqala (01) kuTshazimpuzi ngowama-2025, njengomhla wokuqalisa ukuphumeza amanyathelo amatsha engqesho kubasebenzi bezonyango. Izicwangciso zexesha elifutshane kunye nexesha elide, kubandakanywa intsebenziswano nababoneleli bezempilo babucala, baphononongwe ukuze kuqinisekiswe izisombululo ezizinzileyo.
INkulumbuso uMabuyane uphinde waqinisekisa ukuba urhulumente uyayiqaphela indima ebalulekileyo edlalwa ngoogqirha ekukhuseleni impilo yoluntu.
“Injongo yethu kukuqinisekisa ukuba akukho luntu lushiywa lungenalo unyango olufanelekileyo nokuba oogqirha abangaphangeliyo bafumana amathuba anentsingiselo okunikela ngezakhono zabo.”