By Buhle Nomgalasa.
Zonke iindlela zikhokelela kwiCarnival City’s Big Top Arena eKurhuleni kulempelaveki.
Kule khonsathi ngoMgqibelo kukho iimvumi ezifana nooSjava, Big Zulu, The Soil noNtokozo Mkhize.
“Le asiyokhonsathi nje kuphela, luhambo lomculo. Ngamava okubaliswa kwamabali abonakalisa ukuba singoobani na njengabantu, apho sisuka khona nalapho siya khona,” utshilo uRichard Ramudzuli, umphathi womsitho kwiThikho Events.
“Besifuna ukwenza into ebhiyozela iingcambu zenkcubeko yethu, kunye namabali ethu ngendlela echukumisa kakhulu, ngakumbi kwimpelaveki yoSuku loLutsha.” URamudzuli uthe uluhlu olukhethwe ngononophelo lubonakalisa ukutyeba kwamazwi asekuhlaleni kunye neengxelo ezibalisayo.
“USjava kunye noBig Zulu ziimbongi zale mihla, bathetha ngemizabalazo kunye noloyiso lwabantu nje abaqhelekileyo.
“IThe Soil izisa amandla omoya nomphefumlo, echukumisa intliziyo. Imvano zabo ziyaphakamisa. UNtokozo Mkhize umele isizukulwana esitsha sababalisi, engqina ukuba ikamva lomculo woMzantsi Afrika lisezandleni ezomeleleyo, ezinetalente.”