Umdlalo webhola ekhatywayo wamaqela amabini (2) esizwe nozakuba phakathi kweqela lesizwe laseZimbabwe neqela lesizwe laseLesotho, uzakudlalelwa kweli loMzantsi Afrika.
Umdlalo olandelayo wokuzibekela indawo kwindebe yehlabathi phantsi kombutho webhola ekhatywayo wehlabathi ka2026 nozakubanjelwa eMelika, uzakuqhutyelwa kwibala lebhola ekhatywayo iOrlando, eSoweto.
Umdlalo weZimbabwe nozakusingathelwa eMzantsi Afrika yiZimbabwe uzakudlalwa ngomhla wesixhenxe (7) kwinyanga yeSilimela ukutsho oko kwinyanga ezayo. Isizathu sokuba iqela leeWarrious zaseZimbabwe zizokuwusingathela apha eMzantsi lomdlalo wazo neLesotho, kukuba onke amabala aseZimbabwe awekho semgangathweni wombutho olawula ibhola ekhatywayo kwihlabathi iFIFA.
Igosa eliphezulu kurhulumente waseZimbabwe nongusekela mongameli wesibini uKembo Mohadi uvakalise ukuphoxeka nokudandatheka ukufumanisa ukuba elalizwe alisayi kukwazi ukusingatha nawuphi na umdlalo okwizinga leCAF. UMohadi uthe uzibona ehlazekile ekwadanile kukuba ngoku imidlalo yabo bazakuyidlalela ngaphandle kwelizwe labo ngenxa yomgangatho wamabala abo ongekho sezingeni elifunekayo.
UKembo uthe bengurhulumente bazakuyilungisa lenyewe, kwaye bazakuyithathela emagxeni abo ngokuthi bancedise ekwenzeni elinye lamabala akwidolophu yaseHarare iRufaro, nalapho athe abenzeli Harare benzela isizwe sonke siphela.
Amaqela akuluhlu labo aquka iNigeria, iBafana Bafana, iBenin, neRwanda. IRwanda ikwindawo yokuqala (1) kanti yona iLesotho ihleli kwindawo yesihlanu (5) emva kwemidlalo emibini (2), inamanqaku amabini (2) emva kokudlala ngokulingana kuyo yomibini (2) lemidlalo sele beyidlalile.
Kanti iZimbabwe yona emva kwemidlalo emibini (2) nayo inamanqaku amabini (2) emva kokudlala ngokulingana yomibini (2) imidlalo yayo ihleli kwindawo yesine (4).
IZimbabwe, iLesotho neNigeria zontathu (3) zinamanqaku amabini (2) emva kwemidlalo emibini (2), kunjalo nje omathathu (3) adlale ngokulingana kuyo yomibini (2) imidlalo yayo.
Emva kwalomdlalo neZimbabwe, iLesotho izakudlala neRwanda idlalela ekhaya ngomhla weshumi elinanye (11) kule nyanga izayo yeSilimela ngentsimbi yesithandathu (18h30) malanga.
Umdlalo olandelayo weZimbabwe emva kwalomdlalo neLesotho, izakuqubisana neBafana Bafana ngomhla weshumi elinanye (11) kwinyanga ezayo yeSilimela eFreyistata.
By Siphiwo Boqwana