By Lilitha Phenduka.
Ngokwengxelo yeBhodi yoTywala (ECLB), le migaqo ijolise ekomelezeni nokukhuthaza urhwebo lotywala olunenkathalo kwiphondo liphela ngokuyila inkqubo-sikhokelo elungelelanisiweyo yokukhutshwa kwamaphepha-mvume, ukubeka iliso kwakunye nokunyanzeliswa kokuthengiswa kotywala kwiphondo leMpuma Kapa.
Upapasho ludiza ukuba ingqonyela yebhodi, uGqirha Nombuyiselo Makala ugxininise ukubaluleka kolu tshintsho lolawulo, esithi ukwaziswa kwale migaqo mitsha kubonisa ukuzibophelela kwabo ekuqinisekiseni ukuba ukushishina ngotywala eMpuma Kapa kuqhutywa ngendlela ethembekileyo nethobelayo kwaye olunye utshintsho lukhulu lubandakanya ukudityaniswa kweemfuno zikamasipala kwinkqubo yokukhutshwa kwamaphepha-mvume otywala.
Abafaki-zicelo bamaphepha-mvume okuthengisa utywala ngoku kufuneka bafumane iimvume kumasipala, iziqinisekiso zabemi, kwaye babambelele kwimigaqo yokusebenza kwamashishini asekuhlaleni. Oko kukuqinisekisa ukuba inkqubo ihambelana neemfuno ezibanzi zoluntu kunye nezicwangciso zedolophu.
Ukongeza, inkqubo yokuqinisekisa iminyaka nayo yomeleziwe. Zonke iindawo ezithengisa utywala ezibhalisiweyo ngoku kufuneka ziphumeze amanyathelo asisinyanzelo okuqinisekisa ubudala, ukuthintela ukusela kwabantu abangaphantsi kweminyaka yobudala.
La manyathelo aquka uqwalaselo lokuchongwa phambi kokuthengiswa kotywala kumnyango wezakhiwo.
Eli nyathelo lihambelana nenjongo ebanzi yokukhuthaza ukusela ngendlela efanelekileyo kunye nokukhusela abantwana abasebancinane.
Kwinguqu enkulu yezemali, i-ECLB ivakalise ukunyuka kweentlawulo zelayisensi, ukulungiswa komrhumo wokuqala kwiminyaka elishumi.