Oonqevu abathandathu badutyulwe babhubha ngokumasikizi ngexesha bedubulana namapolisa kuhola wendlela u-N2 kufuphi noNdabakazi ngaphandle nje kwaseGcuwa, eMpuma Kapa. Esi siganeko senzeke ngoLwesine umhla wamashumi amabini (20) kweyoMdumba 2025.
Amalungu asebenza kwiYunithi yoNgenelelo kaZwelonke aye aphendula ngokukhawuleza emveni kokufumana ulwazi malunga nezithuthi ezimbini zisingise eCofimvaba kuphethwe imipu. Amapolisa athe akuchonga ezi zithuthi kufuphi naseCofimvaba azamae ukubamisa. Aba barhanelwa babaleka ngezithuthi zabo.
Aleqisa ke amapolisa, kwafika noncedo ekufumaneni aba barhanelwa, kuthe xa bephakathi noNdabakazi kunye neGcuwa, abanqevu bazinqikela elona litye linembovane ngokudubula kuqala ngakumapolisa, aziphendezela ke abakwasidlodlo kwacaca ke abona bafumene uqeqesho ngemipu.
Ngexesha lokuhlola indawo yesiganeko, oonqevu abathandathu bafunyanwa bebhubhile, kwathathwa nalemipu bebeyisebenzisa.
Eli tyala ke linikezelwe IkwiCandelo loPhando lwamaPolisa eliZimeleyo ukuze kuphandwe ngokubanzi.