Uluntu lwaseMakhanda lushiyeke lubambe ongezantsi kulandela ukubhubha kwabantu abathandathu (6) kuquka nomntwana oselula ngethuba iteksi iyokuntlitha indlu ngobusuku bangoMgqibelo umhla wesine KuCanzibe.
Umasipala waseMakana uthi le ngozi emanyumnyezi yenzeke kwisitalato i-O eTantyi emva kokuba esisithuthi siphelelwe ziziqhoboshi (Brakes) . Isithethi sikamasipala uAnele Mjekula, uthe umqhubi, abakhweli abane abaquka umsebenzi kamasipala, nomfana okwishumi elivisayo leminyaka ubudala, obezihambela ngeenyawo ngethuba egilwa sesisithuthi, babhubhele kwindawo yexhwayelo.
Ukwathe ooceba bekhokelwe nguSomlomo uMabhuti Matyumza baye bagxalathelana ukuya kwindawo yengozi nalapho baye bathuthuzela uluntu olothukileyo. UMjekula ukwabongoze uluntu ukuba lohlukane nokwabelana ngevidiyo enemifanekiso ethathwe kwindawo yengozi.
Kusenjalo, usodolophu oLawulayo kumasipala wesithili saseSarah Baartman, uDeon De Vos, umemelele abaqhubi beemoto ukuba bathobele imithetho yendlela kulandela le ntlekele. Ukwathumele iminqweno emihle yokuphila kubantu abathathu abasindileyo abachacha kwizibhedlele zaseMakhanda naseGqeberha.