Kubonakala kuzakutaka iintlantsi kumdlalo wePirates na-Amazulu kulempelaveki
Kulindeleke umdlalo ozakuvuthisa amalangatyi ngethuba Amazulu ezakube endwendwele iOrlando Pirates kumdlalo weDSTV Premiership kulempelaveki.
Lamaqela mabini(2) ebekhe athathana kwiveki ephelileyo eDurban apho Usuthu belingabahlinzeki khona nalapho bengakhange baqheliselwe libhakabhaka elimnyama ngenkani ngethuba libabhaxubula ngamanqaku amane(4) bona baphendula ngokufaka amanqaku amabini(2), lomdlalo ibingowendebe yeNedbank wamaqela asibhozo(8) umkhululajezi.
Umdlalo wabo wendebe ubudlalelwa kumabala iMoses Mabhida eDurban nalapho inkundla yebhola ekhatywayo yayigcwele ime ngeembambo amatikiti ethengwe onke aphela kunjalo nje nomdlalo waba kwizinga eliphezulu, omabini amaqela ezimisele namanqaku afakwa kangangoko nalapho kwafakwa amanqaku amathandathu(6) kulomdlalo.
Azakufuna ukubuyisa izitya Amazulu Usuthu olumabheshwa ankone emva kokubhaxabulwa kowayo kwiveki ephelileyo ngamanqaku amane(4) kwamabini(2).
Umdlali waMazulu nobonakala ekwizinga eliphezulu uHendricks Pule Ekstein nowafaka inqaku lokuqala laMazulu uthi bazimisele ukubuyisa izitya kunjalo nje loonto bazimisele ukuyenza ngokujika amatye abe zizonka kuba beyazi mhlophe into yokuba akuzokuba lula naye Ekstein uyingqinile loonto.
Lo mdlalo wabahlinzeki iOrlando Pirates nabandwendweli Amazulu uzakubanjelwa kumabala iOrlando eSoweto ngomgqibelo umhla wamashumi amabini(20) kule imiyo inyanga ngecala emva kwentsimbi yesihlanu(17h30) emva kwemini.
Sakhe sibone ukuba ingaba uJose Riveiro ongumqeqeshi weSea Robbers ukuba uzakubabuyisela na abadlali bangasemva uNkosinathi Sibisi noTapelo Xoki kwisini na emva kokuba bebengekho
kumdlalo weNedbank kwiveki ephelileyo ngenxa yokunqunyanyiswa.
Ukhumbule ukuba ibinguInnocent Maela nomfana omncinci uTapela Cesani oneminyaka engamashumi amabini anesithathu ubudala nowadlala kakuhle ebebefakwe ezindaweni zoXoki noSibisi ukwakha udonda lwangasemva lePiates kwindebe.
Unkosinathi Sibisi yena ebengekho nakumdlalo ebebedlala neqela ebesuka kulo phambi kakuba adlalele iPirates iGolden Arrows kuba wafumana icadi elibomvu kumdlalo ophambi kwalowo wabafana besithende yayingumdlalo neSwallows lowo wafumana khona ukunqunyanyiswa.
By Siphiwo Boqwana