Unogada kwakunye nomongikazi wekliniki yaseSigodlo eAmathole bahlaselwe ngethuba kuphangwa ngoLwesihlanu, bevalelwe ngaphakathi kwindawo egcina amayeza bakhululwa ngentsasa yangeCawe.
Isithethi sesebe lezempilo eMpuma Koloni uSizwe Kupelo uthi amadoda angaziwayo axhobileyo ahlasele aba babini phambi kokuba abe iikhompyutha, umatshini wokufotokopa, ubisi olungumgubo lweentsana, ukutya, iiTV, iimfonomfono kunye necylinder yegesi.
Uthi abaphuli-mthetho babophelela amaxhoba ngaphakathi kwi-dispensary phambi kokuba bavale umnyango ngamakhamandela.
UKupelo uthi babhaqwe ngentsimbi yesithandathu kusasa ngeCawe ngethuba unogada efika emsebenzini wakhe.
Umphathiswa wesebe lezempilo uNkosazana Meth ulukhalimele olu hlaselo watsho ecela inkonzo yesipolisa ukuba ingashiyi naliphi na icala ukuze ikhangele ezi zigebenga ze zigwetywe.
Ukwavakalise inkxalabo yakhe emandla malunga nohlaselo olungeyomfuneko oluchaphazela uhanjiswa kweenkonzo.
Olu luhlaselo lwamva nje lwezixhobo zeli Phondo emva kokubiwa kweentambo zombane kwisibhedlele iDora Nginza eGqeberha nokunyanzelwa ukuba abasebenzi basebenze ngeJenereyitha iintsuku ezintlanu.
Kutshanje kubiwe ucingo lwekliniki iMabandla eKariega.