ISebe leMozulu eMzantsi Afrika (SAWS) likhuphe isilumkiso senqanaba lesiThandathu (6) malunga nemimoya eyingozi namaza azayo kwisithuba seeyure ezingamashumi amabini anesine (24hrs) achaphazela ummandla wonxweme ukusuka ePlettenberg Bay ukuya eMonti.
Kunokulindelwa ukuvuthuza komoya phakathi kwe100-120km ngeyure, nto leyo ekhokelela kwiimeko ezinzima zokuqhuba.
Othethe egameni lezendlela ephondweni u-Unathi Binqose uthi abasebenzisi bendlela nabaqhubi bezithuthi bayabongozwa ukuba balumke okanye bakuphephe ukuba sendleni xa kunokwenzeka njengoko isilumkiso esikhutshwe yiSAWS sinokuba nefuthe elibi, singawisa izithuthi okanye sibangele umonakalo omkhulu kwiipropati kunye neziseko zophuhliso.
Esi silumkiso sikwajolise komasipala baseKouga, Ndlambe naseNgqushwa.
I-SAWS ithi amaza anokonakalisa iziseko ezingundoqo ezingaselunxwemeni, ngelixa iinqanawa zisemngciphekweni wokubhukuqa okanye ukophuka imigca yokuxhoma. Ngaphakathi kwelizwe, iimeko ezifanayo zilindelekile, nangona inqanaba lokulumkisa lithotywe kwinqanaba elityheli lesibini.