Amabhokobhoko ashiyana ngenqaku ne-Ireland kodwa uMzantsi usayibambile indawo encochoyini.
Iqela lombhoxo lase-Ireland livale isithuba phakathi kwalo neloMzantsi Afrika kuluhlu lamaqela esizwe ehlabathi kumbhoxo.
Oku kuvalwa kwesithuba kuza emva kokuba I-Ireland ibethe izitsibabhokhwe ngamanqaku angamashumi amabini anesihlanu kumashumi amabini anesine (25-24) kulempelaveki siphuma kuyo eDurban ngoMgqibelo umhla weshumi elinesithathu (13) kweyeKhala 2024.
Amabhokobhoko asahleli kwindawo yokuqala iyishiya ngento engaphantsi kwinqaku i- Ireland nekwindawo yesibini kuluhlu lehlabathi.
IiAll Blacks ziyibethelele indawo yazo kweyesithathu emva kokubetha iNgilane e-Eden Park ngamanqaku angamashumi amabini anesine kwishumi elinesixhenxe (24-17), iNgilane yona ibekwindawo yesihlanu.
Nangona ibethwe ngamashumi amathathu anesithathu kumashumi amabini anesine (33-24) amanqaku iFrance ngethuba ibethwa yiPortugal kodwa isahleli kwindawo yesine.
I-Italy igqithe ngaphezulu kwe-Australia emva kokubuya kakubi nalapho yothuswa kukubethwa kwabo yiSamoa, yazibethela iTonga ngamanqaku angamashumi amathathu anesithandathu kwishumi elinesine (36-14). I-Azzurri igqithe nje ngenqaku kwiWallabies nangona zona iWallabies ziphumelele umdlalo wazo ngethuba zibetha iWales ngamanqaku angamashumi amathathu anesithandathu kumashumi amabini anesibhozo (36-28) iyibetha okwesibini, iWales ibethelwa kowayo yatsho yaphuma kuluhlu lamaqela alishumi aphezulu kwihlabathi ibe yona iGeorgia ilandela nqo ezithendeni zayo iWales.
ILelos ibethe iJapan ngamanqaku angamashumi amabini anesihlanu kumanqaku angamashumi amabini anesithathu (25-23) nto leyo evimbe iqela eliqeqeshwa ngu-Addy Jones iBrave Blossoms ukuba ingakwazi ukuphumelela umdlalo wokuqala kwesisigaba sesibini loo nto yenza ukuba bayokuhlala kwindawo yeshumi elinesibini begqitha kwindawo ezimbini baze bangaphantsi ngendawo enye nje kwiWales.
Lamaqela atshintshisene ngeendawo kuba iJapan ikwindawo yeshumi elinesine ngaphezulu kwePortugal, nethe yafumana ngokubetha iNamibia ngamanqaku angamashumi amathathu anesixhenxe kumanqaku angamashumi amabini anesibini (37-22), yafumana nje ukunyuka kanye.
ICanada ibethe iqela elibekwa phezulu iRomania ngamanqaku angamashumi amathathu anesihlanu kumashumi amabini anesibini (35-22) e-Ottawa yatsho yagqitha kwiChile, nangona nayo iLos Condores iye yaphumelela ibetha Belgium ngamanqaku angamashumi amathathu anesithathu kwamahlanu (33-5).
Nalu uluhlu lwehlabathi lamaqela ombhoxo amazwe alishumi aphezulu, uMzantsi ekuqaleni (1) ushiya kancinci I-Ireland ngenqaku kwindawo yesibini (2), kulandele iNew Zealand kwindawo yesithathu (3) ibe yiFrance kweyesine (4), iNgilane ibe kwindawo yesihlanu (5) kulandele iScotland endaweni yesithandathu (6).
Kwindawo yesixhenxe (7) kuhleli i-Argentina kuze I-Italy ibe kwindawo yesibhozo (8), ibe yi-Australia kweyethoba kuvale emsileni iFiji.
By Siphiwo Boqwana