By Nyameka Lamani
Ityala lokubulawa likaHillary Gardee liyaqhubeka kwinkundla ephakamileyo yaseMbombela eMpumalanga namhlanje. UHillary oneminyaka engamashumi amabini anesibhozo(28) ubudala, intombi kaSekela Mongameli we-Economic Freedom Fighters (EFF) uGodrich Gardee, wabulawa kabuhlungu ngoTshazimpuzi ka-2022,umzimba wakhe wafunyanwa kwindawo yamaplanga ngaseLydenburg.
URassie Nkuna, nosele ethothoza isigwebo sobomi ngezigwebo zangaphambili ujongene nezityholo zokubulala kunye nokuthintela ubulungisa malunga nokubhubha kukaHillary Gardee. Ityala lanqunyanyiswa ngoTshazimpuzi ka-2023 ngenxa yokungafumaneki kwamangqina aphambili kodwa laphinda lavuselelwa ekuqaleni kwalo nyaka.
Usapho lakwaGardee luveze umnqweno wabo wokubona ubulungisa busenziwa ngokubulawa kukaHillary. UGodrich Gardee ubongoze iGunyabantu lezotshutshiso (NPA) ukuba lisingathe eli tyala ngononophelo ukunqanda ukulibaziseka. Ugxininise ukuba ityala kufuneka liqhube ngaphandle kwamagingxi-gingxi, elumkisa ngelithi nakuphi na ukungahambi kakuhle kunokuba neziphumo ezibi. Eli tyala lingatsala umdla kuluntu namajelo eendaba, liqaqambisa imiba eqhubekayo yobundlobongela obusekelwe kwisini eMzantsi Afrika kunye nemfuno engxamisekileyo yobulungisa.