By Lilitha Phenduka.
UMphathiswa wezoThutho noKhuseleko loLuntu, uMnu Xolile Nqatha ukhuphe ngokusesikweni iinkcukacha-manani zolwaphulo-mthetho kwiziko loluleko i-St Albans eGqeberha, kwiSithili saseNelson Mandela Bay ngoLwesithathu.
Ngokwengxelo, iinkcukacha-zolwaphulo-mthetho ezibonakalisiweyo zezexesha elisukela kumhla wokuqala kweyeKhala ukuya kowamashumi amathathu ananye kweyoMnga wama-2024 kwi phondo leMpuma Kapa.
Kwizithili ezilishumi elisinexhenxe (17) abathe babika izenzo zolwaphulo-mthetho ezihlasimulisayo, kukho ukuhla ngamatyala aliwaka elinamakhulu asibhozo namashumi amathandathu anesithandathu (1 866) (4.5%). Amatyala angamashumi amane ananye amawaka namakhulu amabini anamashumi amane anesithandathu (41 246) ewonke axeliweyo kwikota yesibini (2), xa kuthelekiswa namatyala angamashumi amathathu anethoba amawaka anamakhulu amathathu anamashumi asibhozo (39 380) kwikota yesithathu.
Ngaphandle kokuhla ngokubanzi kwamanye amacandelo olwaphulo-mthetho abalulekileyo, iNelson Mandela Bay ihleli isesona sithili sineziganeko zokubulala nokuxhwilwa kwabantu kweli phondo.
Izikhululo zamapolisa zaKwaZakhele, eNew Brighton, Kwanobuhle naseMotherwell zibhale ezona ziganeko zokubulawa kwabantu abaninzi kweli phondo, kwaye zikwaphakathi kwezikhululo zamapolisa ezingamashumi amathathu (30) eziphezulu elizweni.
UNqatha ngethuba esenza intetho yakhe, wongeze ngelithi, bengurhulumente bagxile ekuqiniseni amaqhinga okulwa ulwaphulo-mthetho ukuze balungise izenzo zolwaphulo-mthetho. Iinzame sele zibonisiwe kwisithili sase-OR Tambo, apho besasaze icandelo lezobukrekrele lesizwe kunye namanye amacandelo amapolisa akhethekileyo ukulwa nemiba enxulumene nokuxhwilwa kwemali kunye nolunye ulwaphulo-mthetho olunobuzaza.
Ezona zithili zibe negalelo elikhulu kube sisithili sase-Nelson Mandela Bay nge-23.4% ibonisa ukuncipha nge-7.1%, umasipala ombaxa we-Buffalo City nge-19.9% yegalelo ibonisa ukwanda nge-1.3% kunye neSithili sase-OR Tambo nge-14.2% yegalelo ze yabonisa ukuncipha nge-2.4%.