Ohhw haysukaa Madoda into xa intle iyabukwa kwaye inconywe.
Igqiyazana lowasetyhini, nogama linguOnwaba Mleve nguSomashishimi ophume izandla kwaye uneembasa eziliqela nezingqina oko. Lo wasetyhini unguMseki kwakunye noMphathi weNkampani ephethwe linenekazi elimnyana kwiPhondo leMpuma Koloni iZazi Holdings Factory.
Le Nkampani evelisa iimpahla zesintu kuquka nezalemihla iqeshe phantse abantu abangaphaya kwamashumi alithoba kuquka nabafundi beDyunivesithi kwivandelo lezefashoni.
Ngethuba sityelele kwishishini likaOnwaba, nobonakele epholile kwaye encokola nabasebenzi bakhe, siqaphele uninzi lwabasebenzi kwanokuchulamnca kwabo emsebenzini, nabasamkele ngobubele nto leyo ethi bonwabile apho bakhoyo.
UOnwaba uthi elishishini waliqala eGcuwa apho wayevelisa khona iimpahla enabasebenzi abangamashumi asixhenxe(70) kodwa ngenxa yezidingo zabantu baseMonti, kwanyanzeleka ukuba eze kufutshane.
Uchazile ke nangemiceli-mngeni oSomashishini abajongana nayo, kuquka naleyo yokuxhaswa ngemali nguRhulumente, kodwa ngethamsanqa umqa nakuye wawa esandleni. Kaloku wathweswa ngu(Productivity SA National Awards) apho baphumelela emagqabini kwabo basakhulayo.
IZAZI yanxibisa uMphathi we Eastern Cape Hustlers Awards ngosuku lokuqala kwinyanga ka April. Ukanti leNkampani sele inkulu de yabe inxibisa nooSaziwayo beli abafana noLusanda Mbane; Zintle Kwaaiman; Zuko SA; Lelwar Smith; Zenande Mfeya nabaPhathiswa abaliqela.
Kwiveki edlulilelo uOnwaba uvule ngokusesikweni ivenkile yakhe nethengisa iimpahla zalemihla kuquka nemibhaco yesiXhosa.
