I-Ofisi yoMphathi wezoTshutshiso kuluntu isezakuthatha isigqibo sokuba ingaba inkosikazi yaseGqeberha, ekutyholwa ukuba iqulunqe icebo elibanzi lokubulala owayesakuba ngumyeni wayo, ingaxoxwa na kwinkundla ephakamileyo.
U-Ethel Noqekwa (47) obekwe ityala lokubulala ugqirha Bantu Noqekwa (56) uvele ngokufutshane kwinkundla kamantyi eNew Brighton ngoMvulo.
Inkundla ive ukuba amapolisa alugqibile uphando lwawo kwaye ngoku kuxhomekeke kuDPP ukuba athathe isigqibo sokuba ityala lisiwa kwiNkundla ePhakamileyo.
U-Ethel ukhululwe ngebheyile kwinkundla ephakamileyo yaseGqeberha kweyoMnga, ngesibheno, ngethuba iJaji yasikhaba isigqibo sikaMantyi waseNew Brighton owakhaba ibheyile yakhe.
UGqr Bantu Noqekwa wadutyulwa wabulawa kwindawo axelengela kuyo eZwide ngoMeyi.
U-Ethel utyholwa ukuba wenza iyelenqe lokubulawa kwakhe encediswa ngumntu ophakathi, nothe wajika waba lingqina likarhulumente.
Ngaphambili inkundla ive ukuba unyana wakhe uye wavunyelwa ukuba angene kwiyelenqe lokubulala nanjengoko engumabi welifa likamfi, nto leyo ethetha ukuba kuza kufuneka akhuphe imbuyekezo yababulali.
Izibulo lesi sibini kutyholwa ukuba lalivumelana nomama walo.
Abo bane atyholwa nabo, u-Andile Jongi, uSiyabulela Gcayiya, uAthule Mtyobile noMphumzi Ndzimela, baseseluvalelweni, ngelixa belindele ukuxoxwa kwetyala.
Ityala lihlehliselwe umhla weshumi elinesibini kuTshazimpuzi.