Isebe lezemfundo kwiphondo leMpuma Koloni lithi njengenxalenye yeenzame eziqhubayo zikarhulumente zokuphucula iziseko zophuhliso ezikolweni, iNkulumbuso yephondo uOscar Lubabalo Mabuyane kunye noMphathiswa wezeMfundo uFundile Gade ngoLwesine weshumi elinesihlanu (15) kuCanzibe 2024 banikezele ngesikolo samabanga aphantsi iSolomzi esandula kwakhiwa kwilali yaseMdeni eTlokoeng (ebesaziwa njengeMount Fletcher) kwisithili saseJoe Gqabi.
Isebe lithi ukwakhiwa kwesikolo samabanga aphantsi iSolomzi kuyinxalenye yephulo lokukhawuleziswa kweziSeko zoPhuhliso lweZikolo (i-ASIDI) elijolise ekuphuhliseni izibonelelo zezikolo ngokususa izakhiwo ezingakhuselekanga njengezakhiwo zodaka kunye nezindlu zangasese ezinemingxuma.
Isakhiwo esitsha esakhiwe ngendlela yala maxesha siqhayisa ngezinto eziluncedo ezibandakanya amagumbi okufundela alishumi elinesihlanu (15), iziko (iMultipurpose Centres), amaziko esondlo kunye namaziko ethala leencwadi.
Kwiphulo likarhulumente wePhondo lokomeleza inqanaba loPhuhliso lwaBantwana aBasaqalayo, eli ziko likwabandakanya amagumbi amabini okufundela eBanga R (Grade R) kunye neziseko ezingundoqo ezibalulekileyo ezifana nombane, amanzi kunye namaziko okuhlamba afanelekileyo.
“Ukuzinikela kwesikolo kuphuhliso nophuculo lwemfundo kububungqina kwindlela esiqhuba ngayo ezifundweni, ezinamanqanaba okupasa athe gqolo ukuba phezulu minyaka le, ebonisa umsebenzi onzima owenziwa ngabafundi nootitshala.” litshilo isebe kwingxelo yalo