By Siphiwo Boqwana
Akhale ngaphantsi Amazulu phezolo kumdlalo wokuqala wabaqeqeshi abatsha tsha uVilakazi noZwane.
Baqale kakuhle abafana abakhuselayo kwiNdebe yeCarling KnockOut ekuhambeni ngethuba beyokubethela kowayo Amazulu ngomhla weshumi elinesibhozo (18) ngamanqaku amabini kwelinye (2-1) kumabala iKing Zwelithini, eMnambithi.
Umdlalo walamaqela mabini ubuvutha amalangatye kodwa abakhuseli bendebe bophise kuqala ngethuba bebhalisa inqaku elihle kwisiqingatha sokuqala somdlalo ngenqina likaDevon Titus, saphela isiqingatha sokuqala iStellenbosch sinqenqeza phambili ngenqaku elinye eqandeni (1-0).
Kwisiqingatha sesibini amakhwenkwe kaZwane noVilakazi abuye ngamandla ehlasela kanobom aze avuzwa ngenqaku, alingana ngelinye macala (1-1).
Athe esahlasela njalo Amazulu ephosa amathuba kunjalo nje engapheli kumhlaba weStellies, suke amakhwenkwe kaBarker afika ngathi kudala afaka inqaku lempumelelo yahamba phambili iStellies ngamanqaku amabini kwelinye (2-1).
Nangona Usuthu luhlasele kwade kwangumzuzu wokugqibela khange balibone elidlalayo, uphele umdlalo kuphumelela iStellies ngamabini kwelinye (2-1).
Umdlali obalaseleyo womdlalo ibe nguDavon Titus weStellies nomke nekhulu lonke lamawaka erandi (R100 000) ngemini enye nomdlalo omnye nje kuphela.
By Siphiwo Boqwana