By Siyakholwa Vuso.
Owayesakuba yiNtatheli ye-Tru FM, uOndela Lulamela Mbana, ubhengezwe njengomsasazi omtsha wenkqubo yophando edumileyo ku-SABC 1, i-Cutting Edge. Esi sibhengezo senziwe kwiveki ephelileyo, siphawula isiganeko esibalulekileyo kuhambo lwakhe lweminyaka elishumi elinesithandathu kumajelo eendaba.
“Ndothukile xa ndifumana iindaba zokuba ngoku ndingumsasazi omtsha we-Cutting Edge, kumabonakude, kudala ndisenza unomathotholo ubomi bam bonke,” utshilo uMbana. “Kodwa ngoku sele ndiqalile kumabonakude, sele ndiyibona indlela eza kundikhulisa ngayo, ngakumbi kubuntatheli obuphandayo.”
Uzalelwe eMpuma Kapa kwaye wakhulela kwikhaya elizele lusapho olukhulu, uMbana uncoma impumelelo yakhe kwinkxaso yoluntu kunye nosapho lwakhe. “Umntu ngumntu ngabantu,” utshilo. “Ndiye ndaqhubeka kuba bendifuna ukubonakalisa ukuba ukusuka kwindawo yasemaphandleni akuthethi ukuba awukwazi ukufezekisa amaphupha akho.”
Uhambo lukaMbana losasazo lwaqala emva kokuba efundele ubuntatheli kwiDyunivesithi i-Walter Sisulu (i-Border Technikon ngoko). Wafumana umsebenzi wakhe wokuqala kwi-CKI FM (ngoku ebizwa ngokuba yiTru FM) ngokuqeqeshelwa umsebenzi, nto leyo athe wayifumana ngethuba efowunelwa ngumhlobo wakhe uNontuthuzelo Mendu.
“Ndandisebenza kwa-Spar e-Cambridge, ndinxunguphele, xa wayendifowunela esithi kukho enye indawo engakumbi yomntu oqeqeshelwa umsebenzi kwi-Tru FM.”
Nangona unomathotholo esisithandwa sakhe sokuqala – usasebenza njengomfundi weendaba ze-SAfm kunye ne-Radio 2000 – uMbana uthi uyawamkela lo mngeni-mtsha kwa-Cutting Edge ngothando nenjongo.
“Nangona yayingelophupha lam ukuba kumabonakude, ndiziva ndiwongekile. Le nkqubo imalunga namabali abantu bokwenyani, kwaye njengabasebenzi bezosasazo, umsebenzi wethu kukufumana iimpendulo zabo kwaye sibambe abo basemagunyeni ukuba baphendule.”
Ukwanike imbeko kubacebisi ngeentsuku zakhe zobuntatheli, kuquka nongasekhoyo uMnu Zukile Rhuga kunye noMnu Lumko Jimlongo, abathe bamfundisa eyona njongo yobuntatheli.
Njengoko elungiselela ukuzisa amabali asekuhlaleni kumboniso wesizwe, uMbana ukhuthaza abanqwenela ukuba ziintatheli ukuba bahlale benyanisekile kubo: “Musani ukuxelisa abanye. Yiba nenyaniso. Thatha indawo. Kukho indawo yamabhinqa kolu shishino.”
Ukuqeshwa kukaMbana kubonisa isahluko esitsha se-Cutting Edge, ethembisa ukubalisa amabali asuka entliziyweni asekelwe kwinyaniso, ubulungisa, kunye namazwi abantu bemihla ngemihla baseMzantsi Afrika.