UMrhanelwa oneminyaka engamashumi amathandathu anesine (64) ubudala kulindeleke avele enkundleni yamatyala eMthatha namhlanje (06) kweyoMqungu 2025 uMvulo ngesityholo sokubulala.
Oku kulandela ukudutyulwa kubulawe indoda eneminyaka engamashumi amathathu anesihlanu (35) ubudala ngeCawe eHillcrest, eMthatha.
Ngokwengxelo ixhoba lidutyulwe esUswini kwisithuba malunga nentsimbi yesibhozo (20h00) ebusuku. Umrhanelwa ubanjwe ngamapolisa aseMadeira encediswa liqela lethutyana lamapolisa kwisithili.
Isithethi samapolisa kummandla waseMthatha uCaptain Welile Matyolo uthi esi sibini besinengxabano ngaphandle kwendawo yokuhlala apho kutyholwa ukuba umrhanelwa udubule ixhoba, laze langeniswa esibhedlele apho libhubhele khona kamva ngamanxeba okudutyulwa.
Ingxelo yamapolisa ibhence ukuba ngethuba ebanjwa kwindawo ebezimele kuyo umrhanelwa kufunyenwe umpu oluhlobo lwe-9mm, ekukholelwa ukuba usetyenziswe kudubulo, kwaphindwa kwafunyanwa neembumbulu ngaphandle ezingekhomthethweni. Inombolo yompu ibikhuhliwe ngokutsho kwamapolisa.
Uhlolo kulompu luzoveza ukuba ngenene nguwo osetyenziswe ukubulala ixhoba kusini na.
Umrhanelwa ubekwe ityala lokubulala, elokufunyanwa nompu ngaphandle kwemvume neembumbulu.
Ibambela mkomishinala kwisithili se-O.R.Tambo Brigadier Vukile Ntandane uncome amapolisa ngokukhawuleza anqakule umrhanelwa ukuze kwenziwe uubulungisa kwixhoba, usapho kunye nezihlobo.