Uvalelwe ngaphandle uTau nguBroos kanti uWilliams yena usenomonzakalo.
Libhengeziwe iqela labadlali beBafana Bafana ngumqeqeshi walo uHugo Broos ngoLwesine ukutsho oko phezolo umhla wamashumi amabini anethoba (29) kule yeThupha inyanga.
UBroos ubize abadlali abatsha abane kweliqela, abo badlali nguRushwin Dortley ongumdlali omtsha weKaizer Chiefs, ibe nguFawaaz Basadien weStellenbosch nofunwa kakhulu yiChiefs, uThalente Mbatha wePirates noxolise UBroos kulemidlalo yeMTN8 mibini.
UBathusi Aubus weSundowns noPercy Tau weAl Ahly ababuyiselwanga kweliqela nanjengoko bebekhona kwiqela ebelidlale ngokulingana neNigeria labetha iZimbabwe ngenyanga yeSilimela kulonyaka ka2024 kwimidlalo yokuzibekela indawo kwindebe yehlabathi.
Ezipalini abakhoyo nguSipho Chaine wePirates, uVeli Mothwa noRicardo Goss kuba akekho uRonwell Williams weMamelodi Sundowns nofumene umonzakalo.
Ngabadlali abangamashumi amabini anesithathu abachongiweyo nguHugo elungiselela imidlalo yeNdebe yeAfrika Cup of Nations nezakubanjelwa eMorocco kunyaka ozayo ngenyanga yoMnga ngomhla wamashumi amabini ananye (21) ukuya kumhla weshumi elinesibhozo (18) kwinyanga yoMqungu kunyaka ka2026.
IBafana ilungiselela umdlalo wayo wokuqala wokuzibekela indawo eMorocco kwindebe yaseAfrika yamazwe nalapho izakuqubisana neUganda ngomhla wesithandathu kwinyanga ezayo yoMsintsi kumabala aseOrlando eSoweto ngentsimbi yesithandathu malanga. Omnye umdlalo abazakuwudlala ungomhla weshumi kwakwinyanga ezayo nalapho bezakudlala neqela lesizwe laseSuden ekuhambeni.
Naba abadlali abakhethiweyo beBafana Bafana, ezipalini nguSipho Chaine wePirates, uVeli Mothwa waAmazulu noRicardo Goss weSupersport United.
Ngasemva ubize uRushwin Dortley weChiefs, uSiyabonga Ngezana weFCSB eRomania, uGrant Kekana, uAubrey Modiba, Khuliso Mudau, noThapelo Morena beSundowns, uNkosinathi Sibisi wePirates uFawaaz Basadien weStellenbosch FC noSydney Mobbie weSupersport United.
Esuswini ufake uSphephelo Sithole weTindela SC ePortugal, uTeboho Mokoena weSundowns, uThalente Mbatha wePirates noJayden Adams weStellenbosch FC.
Kwiifolosi nguElias Mokwena weES Tunis eTunisia, nguThemba Zwane weSundowns, nguLyle Foster weBurnley eNgilane, nguPatrick Maswanganyi noRelibohile Mofokeng bePirates, Iqraam Rayners weSundowns, noOswin Appolis wePolokwane City.
By Siphiwo Boqwana