Ngokwengxelo yobalo lonyaka ka-2022, inani labantu baseMpuma Koloni linyuke nje ngaphezulu kwe-10%.
INkulumbuso yephondo leMpuma Koloni uOscar Mabuyane, ifumene le ngxelo kwiBambela leNgcali-manani-Jikelele, uYandiswa Mpetsheni, ngoLwesine umhla we 19 October 2023.
Le ngxelo iqaphele ukukhula nge-10.2% kubemi baseMpuma Koloni, ukusuka kwi-6.5 yezigidi ngo-2011 ukuya kwi-7.2 yezigidi ngo-2022.
INkulumbuso ithe ezi nkcukacha zibonisa ukuba iPhondo leMpuma Koloni liphondo lesine elinabantu abaninzi elizweni, lisuka kwindawo yesithathu kubalo oludlulileyo.
“Uluntu oluntsundu luthe gqolo ukongamela abemi beli phondo ku-85.6%, kulandele abebala (Colored) ngo-7.6%, abamhlophe (Whites) baku-5.6%, amaNdiya nama-Asiya agalele i-0.5%,” uthethe watsho uMabuyane.
Wongeze ukuba kubalulekile ukuqaphela ukuba i-56.1% yabantwana abaneminyaka eyi-0-4 bayafikelela kwiNkqubo yoPhuhliso lwaBantwana kwaye baxelwe ukuba baya kuMaziko e-Educare kulo lonke iphondo.
“Kubantu ababudala buphakathi kweminyaka emi-5 ukuya kwengama-24 abahamba isikolo nabo babonise ukunyuka okumangalisayo nge-4.8% ukusuka kwi-72.5% ukuya kuma-77.3% ngo-2022.
Oku kubonisa inkqubela entle njengoko eli phondo liyitshintsha indlela ebalisa ngayo xa kuthethwa ngemfundo kwaye libonakalisa ukuzinikela ekuboneleleni ngotyalo-mali oluzinzileyo kwezemfundo”.
UMabuyane ukwathe ingxelo yobalo bantu ibonise ukuba “i-49.5% yamakhaya inamanzi aphuma kwimibhobho ngaphakathi kwizindlu zokuhlala, logama i-17.6% yemizi inemibhobho yamanzi ngaphakathi eziyadini ze i-13.4% ifumana amanzi ngaphandle kweeyadi.
INkulumbuso ithe i-58.7% yamakhaya anezindlu zangasese ezigungxulwayo, inyuka isuka ku-43% kuBalo-bantu luka-2011, kwakunye ne-53.9% yamakhaya eMpuma Koloni aye asuswa inkunkuma kanye ngeveki.
Le ngxelo ikwaqaphele ukuba ngaphezulu kwesiqingatha semizi yaseMpuma Koloni, okanye umyinge wama-51.9%, ikhokelwa ngabasetyhini.
Iinkcukacha-manani zabemi baseMpuma Koloni ngokwesithili:
I OR Tambo ime ku- 1,501 702
Umasipala ombaxa weNelson Mandela Bay – 1,1 90 496
Umasipala ombaxa waseBuffalo City – 975 255
Alfred Nzo– 936 462
Isithili saseAmathole– 871 601
Isithili saseChris Hani. 828 387
ISithili saseSarah Baartman– 533 253
ISithili saseJoe Gqabi– 393 04