UMphathiswa woPhuhliso lwamaPhandle noHlaziyo lwezoLimo eMpuma Koloni, uNonkqubela Pieters uphehlelele ixesha lokutyala iinkozo kwiphondo eNkondlo kuMasipala weNgingqi wase-AB Xuma.
Bangaphezu kwama-9,000 amafama kweli phondo aza kuvelisa ukutya okuziinkozo kwiihektare ezingaphezulu kwama-27,700 ngotyalo-mali oluzizigidi ezingama-R93 olwenziwa liSebe.
Ethetha ngethuba kuphehlelelwa kule veki, uMphathiswa uPieters uthe enye yezinto eziphambili kwisebe yinguqu yexabiso leenkozo ephondweni.
Wongeze ngelithi iSebe lityala imali kumafama antsundu ukuwanyusela kwinqanaba lezorhwebo lo gama liqinisekisa ukhuseleko lokutya kwiintsapho.