IQela le-Economic Freedom Fighters (EFF) lazise ngokusesikweni uMthetho osaYilwayo wamaLungu aBucala kwiNdlu yoWiso-mthetho ojonge ukuvala iintengiso zotywala kuMzantsi Afrika uphela.
UMthetho-sihlomelo osaYilwayo woTywala, othiwe thaca liLungu leNdlu yoWiso-mthetho yeSizwe yoMzantsi Afrika kunye neLungu lePalamente uVeronica Mente, uphakamisa izilungiso kuMthetho woTywala wowama-2003 ngokunqanda ukuthengiswa, ukukhuthazwa, kunye nokufakwa kwemveliso yotywala kuzo zonke iintlobo zosasazo.
Ukwafuna ukuthintela ukusetyenziswa kweempawu zentengiso, amagama eenkampani, okanye inkxaso-mali edityaniswe notywala kwimisitho ecwangcisiweyo.
“I-EFF ithathe eli nyathelo lokuqinisekisa ukuba impilo yoluntu, uzinzo kwintlalontle, kunye nesidima sabantu bethu zixatyiswe kunengeniso yeenkampani ezithengisa utywala,” litshilo iqela kwingxelo yalo.
I-EFF ithi utywala buthengiswa kakhulu ngokungathi yindlela yokuphila, iintengiso zijolise nakubantwana abakhula benxulumanisa ukusela nemidlalo, impumelelo kunye nolonwabo.
Lo mbutho umi ngelithi ezi zibhengezo zifihla iziphumo ezibi zokusetyenziswa gwenxa kotywala, eziquka ukophuka kweentsapho, izinga eliphezulu lobundlobongela obusekelwe kwisini, ukubhubha ezindleleni, kunye noxinzelelo kwinkqubo yezempilo karhulumente.
“Iindleko zokwenyani zokusetyenziswa kakubi kotywala zithwalwa luluntu ngokubanzi, ngeli lixa iinkampani zibaleka uxanduva ngenxa yeentengiso ezinobuqhophololo kunye nokunyuselwa ngokungenankathalo,” yongeza i-EFF.
Lo mbutho umemelele uSomlomo weNdlu yoWiso-mthetho ukuba awuthumele ngokukhawuleza lo Mthetho osaYilwayo kwiKomiti yeMicimbi yezoRhwebo, uShishino noKhuphiswano kwaye ukhuthaze iPalamente ukuba ikhawulezise ukusebenza kwayo ngaphandle kokulibaziseka okungeyomfuneko.
Ukongeza, i-EFF ibhenele kuyo yonke imibutho yezopolitiko, imibutho yoluntu, kunye noluntu ukuba luwuxhase lo Mthetho osaYilwayo, iwuchaza njengekhwelo elihlangeneyo lokuthatha amanyathelo.
“Sibongoza abazali, abafundisi-ntsapho, iingcali zempilo, kunye nemibutho yezenkolo ukuba ime kunye nathi ekupheliseni ukuqhathwa kwabantu bethu ngeentengiso zotywala,” litshilo iqela. “Lo ayingomthetho osayilwayo we-EFF kuphela, likhwelo lokuthabatha amanyathelo kwintlalontle yesizwe.
Lo Mthetho usaYilwayo, ukuba uyaphunyezwa, uya kubonisa utshintsho olukhulu kwimiba yentengiso yaseMzantsi Afrika, ucela umngeni kushishino lotywala kunye neempembelelo zalo kumajelo eendaba nenkxaso yemisitho.