By Asipile Kitchen.
UMkhosi wamaPolisa aseGqeberha azuze amanye amagosa alikhulu elinamashumi amahlanu phakathi.
USekela Komishinala wamaPolisa kaZwelonke uGeneral Shadrack Sibiya wazise uOperation Bamba esixekweni, ngeCawa.
Iinjongo zalenkqubo kukunciphisa iziganeko zokubulala nokudlwengula kwindawo ezigqame ngolwaphulo-mthetho eziquka Kwazakhele, New Brighton, Motherwell, KwaNobuhle naKwaDwesi.
Oku kuza emva kweziganeko eziliqela ezenzeke kwesi sixeko ngempelaveki, eziquka ukudutyulwa kwendoda eneminyaka engamashumi amathathu ananye ibhubhe emotweni yayo eMotherwell ngeCawa ngelixa umkhweli wayo ebalekiselwe esibhedlele.
UKongeza, zezinye iziganeko ezimbini zodubulo eBethelsdorp nokuphangwa kwamalungu ecawa eNew Brighton nakwi-US Missionaries eMotherwell ngoMgqibelo.
Ibambela Komishinala wePhondo uMajor- General Zithulele Dladla ebeyile naye, ecaleni kukaKomishinala wamapolisa esithili uMajor-General Vuyisile Ncala.
“Xa ujonga ukubulawa, ukuzama ukubulala, ukutshiswa, ukuphangwa kwezindlu, ukuhlasela ngesondo nokuzama ukudlwengula, ungaqonda ukuba zinyukile,” utshilo okaSibiya.
“Olunye ulwaphulo-mthetho kwisithili nasephondweni luphantsi. Siye sanentlanganiso nabaphathi bezitishi ukuqinisekisa ukubaxhobisa.”
USibiya uthe ukushokoxeka kwezithuthi kuyalungiswa.
UNcata uthe la magosa azojongana nezindawo zigqame ngolwaphulo-mthetho esixekweni.
“Ezi ndawo zizo ezinegalelo ekunyukeni kolwaphulo-mtehtho.”
UMEC woKhuseleko loLuntu uXolile Nqatha uthe amapolisa ayaqinisekisa ukubanjwa kwabarhanelwa ababandakanyeka kudutyulwano oluyelelene neqela lemigulukudu eBethelsdorp, ngelixa abarhanelwa ababini sebebanjiwe ngokunxulumene nokuphangwa kwecawa.
“Njengorhulumente waseMpuma Kapa, sifuna uqinisekisa abahlali baseGqeberha ukuba iindlela zethu zokulwa ulwaphulo-mthetho ziyaqalisa ukuba neziphumo ezintle,” uNqatha utshilo.
“Sifuna nokwamkela ukongezeleka kwezibonelelo ezikhutshwa ngurhulumente kazwelonke, nto leyo ezophucula inzame zethu zokulwa nolwaphulo-mthetho kwi-Metro.
“Singathanda ukulumkisa izikrelemnqa kuba amapolisa awazozinyamezela izenzo zabo ngelixa begrogrisa uluntu.”
Okwangoku, isithethi samapolisa uCaptain Sandra van Rensburg udize ukuba ngoMgqibelo malunga nentsimbi yesihlanu, amapolisa ebexakekile ejikeleza ngellixa emiswa ngabahlali base-Motherwell bewaxelela ngokudutyulwa kwemoto.
“Ngokutsho kolwazi lwakwindawo yexhwayelo, umkhweli ubalekiselwe esibhedlele bayofumana unyango,” utshilo oka-Rensburg.
“Injongo nabarhanelwa abaziwa, kwaye netyala lokubulala nokuzama ukubulala lisaphandwa.”
UVan Rensburg uthe akanalo igama lomfi.
Ubhenele nakubani na ononceda ngolwazi lwesisehlo aqhagamshelane namapolisa aseMotherwell ku-071 687 1267 okanye uCrime Stop ku-08600 10111.