UJustice Mandisa Maya uza kuthatha isikhundla sakhe ngosuku lokuqala (01) kaSeptemba, ethatha indawo yeJaji eyiNtloko uRaymond Zondo.
UJustice Mandisa Maya ngumfazi wokuqala oyiJaji eyiNtloko yelizwe. Uye wonyulwa njengeSekela leJaji eyiNtloko ngoSeptemba ka-2023 emva kodliwano-ndlebe naye yi-JSC. Wayengumongameli weNkundla ePhakamileyo yeziBheno phambi kokuba aqeshwe njengeSekela leJaji eyiNtloko.
I-Ofisi kaMongameli iqinisekisile ukuba iKomishoni yeNkonzo yezoBulungisa (JSC) ikuxhasa ngokupheleleyo ukuqeshwa kukaJustice Maya.
“Kwileta ayibhalele iJaji eyiNtloko uRaymond Zondo ngomhla wamashumi amabini nesibini (22) kweyoMdumba 2024, uMongameli Ramaphosa wazisa iKomishoni yeeJaji ngeenjongo zakhe zokutyumba uSekela-Jaji oyiNtloko uMaya njengeJaji eyiNtloko yeRiphabhliki ekupheleni kwexesha lokuba sesikhundleni kweJaji eyiNtloko uZondo, nge-31 ka-Agasti 2024.
“UMongameli wamema i-JSC ukuba inike iimbono zayo malunga nokufaneleka kukaJaji uMaya ukuba abambe i-ofisi yeJaji eyiNtloko. Iphumeza isigunyaziso sayo sokubonisana esichazwe kwiCandelo le-174(3) loMgaqo-siseko, iKomishoni yenza udliwano-ndlebe noJustice Maya ngomhla we-21 kuMeyi 2024 ukuze iqinisekise ukufaneleka kwakhe ukuqeshwa njengeJaji eyiNtloko yeRiphabliki.”
Ekupheleni konyaka ophelileyo, iBhunga lokuPhuhliswa koMgaqo-siseko woMzantsi Afrika (Casac) latyhola uZondo ngokujongela phantsi iofisi yakhe, kulandela amazwi awawathetha kudliwano-ndlebe neNewzroom Afrika. Lo mbutho uthi ngelo xesha uZondo waphambuka kakhulu kwezopolitiko ngokubeka uluvo lwakhe malunga nokutshutshiswa okuqhubeka kobesakuba ngumongameli uJacob Zuma.