UMongameli uCyril Ramaphosa uthe, ngokweCandelo lekhulu elinamashumi asixhenxe anesine kwisithathu (Section 174(3)) loMgaqo-siseko weRiphablikhi yoMzantsi Afrika, ka-1996, onyule ngoku uSekela-Jaji oyiNtloko uMandisa Maya njengeJaji eyiNtloko yoMzantsi Afrika ukususela ngomhla wokuqala (1) kweyoMsintsi kulo umiyo.
Ukutyunjwa kukaMaya kulandela ukubonisana kukaMongameli, ngokungqinelana nemigqaliselo yoMgaqo-siseko, neKhomishini yeNkonzo yezeeJaji kunye neenkokeli zamaqela ezopolitiko amelweyo kwiNdlu yoWiso-mthetho.
Kwileta ayibhalele iJaji eyiNtloko uRaymond Zondo ngomhla wamabini anesibini (22) kweyoMdumba, uMongameli Ramaphosa wazise iKomishoni yeNkonzo yezeeJaji ngenjongo yakhe yokutyumba uSekela-Jaji oyiNtloko uMaya njengeJaji eyiNtloko yeli ekupheleni kwexesha lokuba se-ofisini kweJaji eyiNtloko uZondo, umhla wamashumi amathathu ananye keyeThupha ka2024.
UMongameli wamema iKomishoni yeNkonzo yezeeJaji ukuba inike izimvo zayo malunga nokufaneleka kukaJaji uMaya ukuba abambe i-ofisi yeJaji eyiNtloko. Nto leyo ephumeze isigunyaziso sayo sokubonisana esichazwe kwiCandelo le-174(3) loMgaqo-siseko, iKomishoni idlan’ indlebe noJaji Maya ngomhla wamashumi amabini ananye (21) kuCanzibe ukuze iqinisekise ukufaneleka kwakhe ukuqeshwa njengeJaji eyiNtloko yoMzantsi Afrika.
Kusenjalo iKomishoni emva koko yamqinisekisa uMongameli weJaji uMaya ukuba ukufanele ukukhokela inkundla yelizwe ngokusekelwe kudliwano-ndlebe, iziqinisekiso zeJaji uMaya kunye noshicilelo lenkundla, iimpawu zakhe zobunkokeli, amava akhe njengejaji kwiinkundla ezahlukeneyo, ubunkokeli bakhe bexesha elidlulileyo kwiNkundla ePhakamileyo. Isibheno kunye nendima yakhe njengoSekela leJaji eyiNtloko kwithuba elikhokelela ekutyunjweni kwakhe nguMongameli.
Ukanti abaKomishinala bakwacebise ukuba ukuqeshwa kukaJaji Maya kuya kuba sisiganeko esibalulekileyo kweli lizwe njengoko uJaji Maya eza kuba ngowasetyhini wokuqala eMzantsi Afrika ukuchongwa njengeJaji eyiNtloko.
UMongameli Ramaphosa uthi uyakubulela ukuzithemba okuvezwe yiKomishoni yeNkonzo yezeeJaji kunye neenkokeli zemibutho yezopolitiko ekufanelekeni kweJaji eyiNtloko ezayo, enokufumana inkuthazo nenkxaso kukuzithemba okubonakaliswe kuye.