UMongameli Cyril Ramaphosa uza kukhokela umbhiyozo weMinyaka enagamashumi amabini (20) yeNkqubo eyaNdisiweyo yeMisebenzi kaRhulumente (EPWP) aze asungule iSigaba sesihlanu sale nkqubo kuMasipala waseBuffalo City, kwiPhondo leMpuma Koloni ngoLwesithathu umhla wamashumi amabini anesine kuTshazimpuzi.
I-EPWP yinkqubo karhulumente wesizwe yokudala amathuba emisebenzi kunye nenkxaso yengeniso kubantu abahlelelekileyo nabangasebenziyo ngokuziswa kwempahla neenkonzo zoluntu, ngaloo ndlela kube negalelo kuphuhliso.
Le nkqubo yenye yeeNkqubo zikarhulumente zeNgqesho yoLuntu ephambili kwaye iphunyezwe kule minyaka ingamashumi amabini (20) idlulileyo ukusukela kuTshazimpunzi ka-2004.
I-EPWP iphunyezwa kumacandelo amane; oko kukuthi, iCandelo leziSeko ezinguNdoqo kunye neCandelo eliNgekho kuRhulumente eliququzelelwa liSebe leMisebenzi yoLuntu kunye neziSeko ezinguNdoqo; iCandelo loLuntu eliququzelelwa liSebe loPhuhliso loLuntu; kunye neCandelo lokusiNgqongileyo neNkcubeko eliququzelelwa liSebe lezaMahlathi, ukuLoba nokusiNgqongileyo.
Ukusukela oko yasungulwa le nkqubo idale ngaphezulu kweshumi elinesine lezigidi zamathuba emisebenzi kuwo onke amaCandelo e-EPWP ngokusebenzisa amaqumrhu oluntu angaphezu kwamakhulu amathathu (300) kunye neMibutho eNgenaNzuzo (NPO) ephumeza i-EPWP.
Ukanti amathuba emisebenzi adalwe kumacandelo afana nokwakhiwa kweendlela, ukulungiswa kweendlela, ukwakhiwa kwezikolo neekliniki, ukunikezelwa kweeNkonzo zophuhliso lwabantwana abasaqalayo, iiprojekthi zohlaza nokucocwa kokusingqongileyo, iiprojekthi zomlilo kunye nokususwa kweeprojekthi zezityalo ezingaqhelekanga.
Oku kukwabandakanya uqeqesho nobuchule kwizakhono zokwakha ukupeyinta, ukubeka izitena, ukuchwela; Izakhono zokukhathalela uluntu lwasekhaya kunye nokucima umlilo.
Ukuphehlelelwa kweSigaba sesihlanu esiphunyezwe ukusuka ngomhla wokuqala (01) kuTshazimpunzi ngonyaka ka-2024 ukuya kumhla wamashumi amathathu ananye (31) kweyoKwindla kunyaka ka-2029 kuya kusetyenziselwa ukutyhila izigidi zamathuba emisebenzi ingakumbi ukuze kuxhamle abasetyhini, ulutsha kunye namakhaya ahluphekayo ukuze kuhlume okubandakanyayo, uphuhliso oluzinzileyo, kunye nokuxhotyiswa koluntu kweli lizwe.
Kusenjalo umphathiswa wesebe lemisebenzi yoluntu neziseko zophuhliso eMpuma Koloni uNtombovuyo Nkopane umemelele uluntu ukuba luchaze naziphi na izenzo zolwaphulo-mthetho ezinokubakho kulawulo lwale nkqubo.