Umtyholwa weshumi kwityala lokubulala kwiYunivesithi yaseFort Hare uzakuvela kwinkundla kamantyi yaseAlice eMpuma Koloni namhlanje. Umanejala ophezulu wale yunivesithi uvele enkundleni ngokufutshane izolo.
Ujongene nezityholo zokubulala nokuzama ukubulala. Umtyholwa uza kuvela kunye nabanye abatyholwa abalithoba kulo mba.
Aba bantu batyholwa ngokubandakanyeka kwabo ekubulaweni kukaManejala yaseFort Hare, uPetrus Roets, kunye nonogada weSekela Ngqonyela uMboneli Vesele.
UMkomishinala wamaPolisa kuzwelonke uFannie Masemola kunye noSekela Mphathiswa wamaPolisa uCassel Mathale kulindeleke ukuba bazimase iindibano zenkundla.
UMkomishinala wamaPolisa ePhondweni uNomthetheleli Mene uthi, “Yasothusa kakhulu kuba umrhanelwa saziwa kuthi njengegosa lale yunivesithi. Lilonke ke kukuqhubekeka kophando okusifikise kwelo nqanaba, ngoko ke sivumela ithuba lokuba abaphandi bafumane ubunyani betyala, ngoko ke, siyakwamkela oko basizisa kona okwangoku.”
Ngenyanga kaTshazimpuzi, umphathiswa wamaPolisa uBheki Cele uncome umsebenzi wamapolisa kumatyala okubulala.