INkundla ephakamileyo yase-Rhawutini kulindeleke ukuba imamele umngeni wowayesakuba nguMongameli uJacob Zuma ngokuchasene ne-SABC malunga nokusebenzisa igama elithi ‘Government of National Unity’ (GNU) ngoMvulo, namhlanje.
UZuma uthe i-SABC inoxanduva olulodwa kwaye ayinakubalisa amabali angeyonyani, angachanekanga, atyekele ecaleni kwezopolitiko ukuchaza ulungiselelo lwangoku lwezopolitiko.
Owayesakuba yintloko yelizwe uthi ulawulo lwesixhenxe lubumba umanyano olukhulu phakathi kwe-Democratic Alliance (DA) kunye ne-African National Congress (ANC).
La maqela afake isicelo esingxamisekileyo ngakwi-SABC ngo-2024 ngalo mba. Nangona kunjalo, iJaji uSeena Yacoob ufumanise ukuba bekungafanelekanga ukuba ilawulwe kwinkundla engxamisekileyo.
Emaphepheni, uZuma kunye noMbutho woMkhonto weSizwe (MK) bathi i-SABC ngoyena mthombo wolwazi kwizigidi zabemi boMzantsi Afrika kwaye ilahlekisa ngabom ukuba ibhekisele kulawulo olukhoyo lwezopolitiko njenge-GNU.
Abafaki-zicelo baxhomekeke kwiinkcazelo ezahlukeneyo ze-GNU ethi, phakathi kwezinye, icaphule isizwe esithe satyhubela isiganeko esimanyumnyezi esifuna inzame emanyeneyo kuwo onke amacandelo esizwe ahlulelene ngaphambili.
Bona, ke ngoko, bangenise ukuba ulungiselelo lwangoku aluhambelani nengcaciso ye-GNU.
Kukwavakaliswa ukuba le nkqubo ikhoyo yasekwa yi-ANC kunye ne-DA, apho ingxelo yeenjongo zayo yatyikitywa nguNobhala Jikelele uFikile Mbalula kunye nosihlalo womanyano uHelen Zille, ngokulandelelanayo.
Bongeze ngelithi enye into efunekayo kwi-GNU kukuba amaqela amele i-85% ukuya kwi-90% abe yinxalenye karhulumente.
Nangona kunjalo, abafaki zicelo bathi amaqela amabini amakhulu, amele malunga ne-25% yabavoti – i-MK Party ngokwayo kunye ne-Economic Freedom Fighters (EFF) – abazange bafakwe njengombandela wangaphambili we-DA.
Kulindeleke ukuba iSABC isichase ngokukrakra esi sicelo.