USaziwayo, nonguMdlali weQonga kumabonakude eMzantsi Afrika uBrenda Ngxoli ufumene uncedo. Lo kaNgxoli utyhutyhe izitalato zamakhasi ezonxibelelwa izolo ngomgqibelo umhla wamashumi amabini anesihlanu (25), kushicilelo lwevidiyo ebonakalisa ingxabano phakathi kwakhe nomzali wakhe.
Ngokwengxelo yoshicilelo leevidiyo, uNgxoli ubonakala ethathana ngamazwi bexabana nonina wakhe ekhayeni lakhe. Unina ke evakala etyhola lo kaNgxoli ngokumbetha, wabe uBrenda ekuphika oko. Oloshicilelo ke lukhutshwe nguNgxoli kwikhasi lakhe lezonxibelelwano, nto leyo ethe yavusa umnyele kubemi beli, abanye bemxhasa, ngexesha abanye begxeka isenzo soshicilelo.
Kuthe ke kusenjalo, isesisanxwe kumakhasi kwavela itsha-ntliziyo neligama linguMandisi Tshingana, noye wabhala kwikhasi lakhe lezonxibelelwano ecela uMzantsi Afrika ukuba ufake usandla ukunceda eli qhawe. Khange ke balibazise abalandeli balenzwakazi ukugxalathelana bethumela oko banako.
Sithetha nje, izolo kulelwe isixa mali esingange R50 000 nangaphezulu sele sithe nca kuNgxoli. Ngethuba ke nathi ebesikhe sayikhangela lenzwakazi sincediswa nguLilitha Ntsundwana, efumaneka edandathekile emphefumlweni, echaza intlungu ajongene nayo ebomini ukuzothi ga ngoku. Indlela ebekunzima ngayo eGoli de abe uthatha isigqibo sokugoduka.
Ukanti ke, umzali yena besingekamfumani ukuze akwazi ukusicacisela.