By Esona Magawana
Icandelo lophando elikhethekileyo (SIU) liyaqhubeka nophando lwalo kwinkulumbuso yephondo leMpuma Koloni uOscar Mabuyane ngezityholo zobuqhophololo kwizifundo zokufumana isidanga semasters kwiDyunivesithi yaseFort Hare. Eli candelo izolo lithe umyalelo wenkundla othintela ukuba kuphandwe ukwamkelwa kweNkulumbuso yaseMpuma Koloni u-Oscar Mabuyane awuzukulumisa uphando.
Isithethi seSIU uKaizer Kganyago uthe isigwebo senkundla ephakamileyo yaseBisho asiluchaphazeli uphando lwabo, nolukwinqanaba eliphezulu.
“Siza kuqhubeka nokuphanda lo mba ngokusekwe kwisibhengezo sesilungiso”,utshilo u Kganyago.
Ibambela lejaji yenkundla ephakamileyo eBhisho uNtsikelelo Mtshabe uthe kwisigwebo sakhe: “Indlela yokuziphatha kweSIU kuphando lwayo lommangali uMabuyane ibhengezwe njengempatho-gadalala, ingqubana nomgaqo-siseko kwaye ijongiwe ze yabekelwa bucala.
UMabuyane, onesidanga sezoqoqosho kule dyunivesithi, wacinywa ezincwadini ze wakhutshwa kwisidanga seMasters eFort Hare ngo2021. UKganyago uthe ngo-2023, uMabuyane waphumelela kwisigwebo esingxamisekileyo senkundla nto leyo eyathintela ekubeni iSIU iqhubeleke phambili nophando malunga nezityholo zokuba wabhalisa ngobuqhophololo ukuze afumane isidanga seMasters kule dyunivesithi.