By Nyameka Lamani
Unobhala-jikelele weAfrican National Congress (ANC) uFikile Mbalula utyhole umongameli waseMelika uDonald Trump ngokuzama ukohlwaya uMzantsi Afrika ngamabango obuxoki ngobundlobongela obujoliswe kumafama amhlophe, egxininisa ukuba intetho kaTrump nge”genocide” ibubuxoki esithi isekelwe kulwazi olungeyonyani.Ebethetha nonondaba eRhawutini ngoLwesibini umhla weshumi elinanye(11) kweyeNkanga emva kwendibano yekomiti yesizwe esebenzayo ye-ANC(National Working Committee).
UMbalula usigxekile isigqibo sikaTrump sokuba i-US ingayi kwingqungquthela ye-G20 eRhawutini engomhla wamashumi amabini anesibini(22) ukuya kowamashumi amabini anesithathu(23) kweyeNkanga
Ukuphendula kwizimvo zikaTrump ezityhola uMzantsi Afrika ngokunyhashwa kwamalungelo oluntu kumabhulu ukhankanye ukuba uTrump akhange athethe ngqo noMzantsi Afrika malunga neenkxalabo zabo kwiintlanganiso ezidlulileyo.Ugxeke uTrump ngokungayivumi imibono yoMzantsi Afrika kwimiba yamazwe ngamazwe,endaweni yoko, uTrump uhlala ethetha kakubi ngoMzantsi Afrika ngaphandle kweengxoxo ezicacileyo.
Ngaphaya koko, isebe lezobudlelwane bamazwe ngamazwe nentsebenziswano laseMzantsi Afrika (i-DIRCO) liwakhabile amabango “embubhiso yabamhlophe”(white genocide) njengezibubuxoki nezingaxhaswanga bubungqina, liqinisekisa ukuba uMzantsi Afrika ulawulwa ngokwedemokhrasi yomgaqo-siseko eqinisekisa ukuba amalungelo abo bonke abemi akhuselwe. Bacacise ukuba abukho ubungqina obuxhasa uluvo lokuba uhlanga oluthile lulo olulixhoba lolwaphulo-mthetho.