By Asemahle Mbete
Kwiveki ephelileyo kutshiswe izakhiwo ezingapha kwesine zaluthuthu kwiDyunivesithi yaseFort Hare eDikeni kwakunye nezinye eMonti.
Oku kulandele uqhankqalazo olunobundlobongela oluye lakhokelela ekubeni kunqunyanyiswe ukusebenza nokufunda ngokupheleleyo leliziko lemfundo aphakamileyo. Olu qhankqalazo beluchazwe njengolubangelwe phakathi kwezinye izizathu kukunganeliseki kwabafundi yindlela isikhokelo seDyunivesithi esibhexeshwa nguNjingalwazi uBuhlungu esiqhwalelisa sibekele bucala iinkokheli zabafundi kwimicimbi yolawulo lwesikolo nekufanelekileyo ukuba babe yinxalenye yayo.
Ngokwengxelo ze-Daily Maverick uBuhlungu uthi udushe nokonakaliswa kwezakhiwo kuquka noqhankqalazo olo aluhambi lodwa koko linempembelelo zangaphandle, ekuquka oosopolitiki abathile ababandakanyeka kuluhlu lwabantu abangamashumi amathathu anesithathu(33) abakuluhlu lwabantu i-SIU ekholelwa ukuba banetyala lokuba nezidanga/iziqinisekiso nezatifikethi zemfundo ephakamileyo zomgunyathi.
Lo ka Buhlungu uthi idyunivesithi ifumene umpoposho ovela kwi SIU iyazisa ngoluhlu oluzakuphuma olunamagama ayi 33 lwabo bafunyaniswe luphando bebandakanyeka kweli Bholo. Uthi ukholelwa ukuba ezi zinzame zokumsusa elulawulweni nokuzama ukuba nefuthe lokuba lengxelo ingaphumi.
Isithethi se SIU uKaizer Kganyaro asifumanekanga ukuphawula xa besithe samtsalela umnxeba malunga nale ngxelo phambi kokuba sipapashe.
Unobhala weSRC uOdwa Msaro uthe abafundi baqale bafuna iingxoxo no Njingalwazi Sakhela Buhlungu, hayi ukutshabalalisa.
“Umbono wethu wokuvala eli ziko uvele emva kokuba uNjingalwazi Buhlungu engayihoyi imemorandam yamabango abafundi,” utshilo uMsaro.
Asizange sibe nenjongo yokonakalisa nantoni na. Xa sibona izakhiwo zisitsha, sothuka njengabanye abantu.
Uyiphikile naye into yokuba ngabafundi ababangele lomonakolo kweliziko, watsho esithi abantu abangaziwayo basenokuba bathe bangena ekhampasini ngexesha lezidubedube.
UMsaro uthi kusalindeleke ukuba abafundi babhale iimviwo zabo kulo nyaka kodwa ngoku bafuna umphathiswa wemfundo ephakamileyo uButi Manamela afake iUFH phantsi kolawulo.
Ukanti umphathiswa uManamela uye wathumela igqiza elikhokelwa nguProfessor Ahmed Bawa ukuba liyokuvavanya imeko kweliziko, ukwagxininise ukuba belisebe okungundoqqo kukuqinisekisa ukuba udushe luphele ze abafundi babuyele enkomeni kuqhutyekekwe nokufunda.
Isithethi samaPolisa uWarrant Officer Nkohli uthe balishumi abathe babanjuwa ukukuzothi ga ngoku, isibini isibini esibanjwe ngempela veki edlulileyo sizakuvela enkundleni kuleveki iqalayo kumatyala okophula umyalelo wenkundla.
**DEVELOPING STORY*