By Nyameka Lamani.
Kubanjwe amadoda amabini emva kokufunyanwa kobhuti wabo ebhubhile, ebotshiwe kwaye evalelwe kuronta, eMpuma Koloni.
NgeCawe amadoda amabini abaminyaka ilishumi elinesixhenxe (17) namashumi amabini ananye (21) ubudala babanjiwe malunga nokubulawa komninawa wabo onamashumi amathathu anethoba (39) ngezityholo zokudlwengula umtshana wabo. Esi sehlo senzeke kwingingqi yaseMambalwini ephantsi kwengingqi yaseXhorhana, eMqanduli.
La madoda mabini atyholwa ngokubetha babulala umkhuluwa wabo ngenxa yokumfumana edlwengula umtshana wabo oneminyaka elishumi elinesihlanu (15) ubudala ngoMgqibelo ebusuku.
Amapolisa awubhaqe umzimba womfi ngentseni yangeCawe.
Isithethi samapolisa uWelile Matyolo uthe: “La madoda mabini atyhola umkhuluwa wawo ngokudlwengula umtshana wabo oneminyaka elishumi elinesihlanu ubudala xa befika bonke ekhaya bevela kwithaveni yasekuhlaleni, bambopha izandla ngentambo bamgcina kuronta otshixiweyo ngobusuku bangoMgqibelo waza umkhuluwa wafunyanwa ebhubhile ngentsasa yangeCawe ngentsimbi yesibhozo (08:00).
Amapolisa aseMqanduli abambe abaninawa ngokubulala”.
Abarhanelwa kulindeleke ukuba bavele enkundleni namhlanje ngosuku lwesibhozo kweyoMsintsi 2025.