By Sophumelela Singqota.
UMkomishinala wePhondo laKwaZulu-Natal uLieutenant General Nhlanhla Mkhwanazi uyalele ukuba amapolisa abonwe ehambisa umfundi kwiTheko lo Mdaniso weBanga leShumi besebenzisa isithuthi samapolisa e-Estcourt, asuswe okwethutyana emsebenzini ngexa kusalindwe uphando lwangaphakathi ngokuziphatha kwawo.
La magosa, njengoko kubonwa kwividiyo eye yasasazeka kumaqonga osasazo ohlukeneyo nakumajelo onxibelelwano, ebesemsebenzini xa ethutha umntwana wogxa wakhe ukuya kumsitho womdaniso wematriki. Ngokwenza oko, amalungu alutyeshela uxanduva lwawo oluphambili lokubonelela ngokubonakala kwamapolisa okufuneka kakhulu, ukuhoya izikhalazo nokugcina abahlali bekhuselekile.
“Ndiyalele uMkomishinala weSithili saseUthukela ukuba aqinisekise ukuba umphathi-mkhosi osondeleyo wamagosa abandakanyekayo kufuneka athathe amanyathelo oluleko angxamisekileyo ngakubo. Asinakukwazi ukuba namapolisa anika ingxelo ngomsebenzi kodwa asebenzise izixhobo zikarhulumente ukuze azuze wona. Ndiphinde ndayalela amagosa ethu olawulo lwezemali kunye nokubonelela ngemali ukuba abone ilahleko yemali urhulumente ebenokuyifumana ngalo msebenzi ungagunyaziswanga.
Ipetroli karhulumente, ixesha likarhulumente kunye neendleko zokusebenza kweso sithuthi kufuneka zibangwe kuloo malungu. Uluntu luhlala lukhalazela ukuba xa lufowunela izikhululo zamapolisa luxelelwa ukuba akukho ziveni, ngelixa amapolisa egxalathelana ngemithombo karhulumente eyenzelwe ukunceda uluntu”, utshilo uLieutenant General Mkhwanazi.
Amapolisa akhunjuzwa ukuba abenobuchule ngamaxesha onke kwaye akhusele umfanekiso wombutho. Izibonelelo zikarhulumente ezinyiniweyo kufuneka zisetyenziswe kuphela kwimisebenzi esemthethweni egunyazisiweyo kwaye nabani na ofunyenwe esebenzisa kakubi izithuthi, okanye nayiphi na impahla karhulumente uya kuhlangatyezwana nengqumbo yeenkqubo zoluleko zamapolisa angaphakathi kunye nesityholo solwaphulo-mthetho esinokukhokelela ekugxothweni.