Kungenzeka ummi wase-Ivory Coast nodlalela iStellenbosch ayokukhongozela amarhewu aluhlaza e-Europe.
Amaqela amabini (2) ebhola ekhatywayo ase-Europe afuna ngamandla umdlali weqela leStellenbosch, eKapa.
IOH Leuven neK.Beerschet V.A ngamaqela aseBelgium anomdla kumdlali walapha eMzantsi Afrika nodlala ephikweni u-Anicet Oura.
UOura uzibandakanye neqela iStellies esuka kwiqela lase-Ivory Coast iASEC Mimosas ekuqaleni kwesizini edlulileyo. Lomdlali uneminyaka engamashumi amabini anesine (24) ubudala ufake amanqaku asibhozo (8) wancedisa ekufakweni kwamanqaku kabini (2).
U-Anicet ulincedile eliqela laphumelela okokuqala (1) indebe ngethuba bephumelela iCarling Knockout bebetha iTS Galaxy ngeepenalthi. Kananjalo eliqela ngokuthi ngcu kwindawo yesithathu (3) kuluhlu lamaqela akwiDSTV Premiership lizibekele indawo kwindebe yase-Afrika iCAF Confederation.
Iqela elinqenqeza phambili ukumfuna u-Anicet yi-Beerschot kulamaqela mabini (2). Lomdlali wase-Ivory Coast udlale imidlalo engamashumi amathathu anesihlanu (35) eqala kwisizini edlulileyo ukuba kwiStellies.
By Siphiwo Boqwana