By Siphiwo Boqwana
Kweli ityeli amaqela ebhola ekhatywayo afundiswe isifundo ngamaqela amakhulu angoompondo zihlanjiwe kwiNdebe ye-Ke Yona.
Asibhozo ngoku amaqela ashiyekileyo kwindebe yeNedbank Ke Yona emva kwemidlalo yempelaveki esiphuma kuyo nalapho aye axhelana kanobomu iyileyo ingafuni ukude iligobe uphondo lwayo. Kusasele iqela lebhola ekhatywayo elinye elingekho kwi-Betway Premiership kungoku njena, eloqela yiDurban City.
Sibonile kuqhawulwa kabuhlungu iqela laseMpumalanga i-TS Galaxy ngethuba likhutshwa kulendebe yi-Durban City nebisakwaziwa njenge-Maritzburg United, i-Team of Choice ibethe iiRockets ngamanqaku amabini kwelinye (2-1) ukugqithela phambili kumlenze wamaqela asibhozo (8). Ukhumbule ukuba ii-Rockets bezize kulomdlalo imisila iphezulu kunjalo nje bezithembile emva kokuqhawula iSundowns kumdlalo weligi nayo yabe i-Sundowns ibizibethele kabuhlungu iPirates ngamane eqandeni (4-0) kwakwiligi.
Ezinye iindaba ezinokuvuyelwa ngabaxhasi be-Nedvank kukuba omathathu (3) amaqela amakhulu asekhona kulendebe, iMamelodi Sundowns ikwazile ukugqithela phambili ngethuba phezolo umhla weshumi elinesithandathu (16) kule imiyo inyanga izibethela iqela eliphuma kwi-ABC Motsepe League ngamanqaku amabini kwiqanda (2-0) kumabala i-Lucas Moripe eTshwane. Uphele umdlalo iqela le-Sundowns sele lishota ngabadlali emva kokudlala kakubi kuka-Matthews nothe wafumana ikhadi elibomvu emva kokunikwa ikhadi elimthubi lesibini (2) kulomdlalo.
Kanti kwelinye icala ngoMgqibelo umhla weshumi elinesihlanu (15) sibone i-Orlando Pirates igqitha kwiBaroka FC ngamanqaku amathathu kwelinye (3-1) kumabala ase-Orlando, eSoweto. Kwangalemini inye i-Kaizer Chiefs itywatyushe kabuhlungu i-Chippa United ngamanqaku amathathu kwiqanda (3-0) kumabala i-Soccer City, eRhawutini.
Amanye amaqela agqithele phambili yiMarumo Gallands ebethe iAmazulu ngelinye eqandeni (1-0) yaze yona i-Stellenbosch yazityela itheko kwiPolokwane City ngokuyibetha ngamanqaku amabini eqandeni (2-0) kumabala i-Dannie Cravan eNtshona Kapa. Elinye iqela nelingene kuqala kumjikelo olandelayo yi-Supersport United nebethe kwixesha olongeziweyo iqela laseKapa i-Cape Town Spurs ngamanqaku amabini kwelinye (2-1) kumabala i-Lucas Moripe, ePitoli ngoLwesithathu kwiveki ephelileyo.
Okwangoku amaqela ebhola ekhatywayo asele eqinisekisiwe ukuba agqithele kumaqela okugqibela asibhozo (8), asesixhenxe (7) ngoku ngenxa yengxaki yeqela likaMamkhize i-Royal AM esesezingxakini ezingapheliyo, iThwihli Thahla bekufanele ukuba idlala nephumeleleyo phakathi kwe-Milford neSekhukhune United.
Kulindeleke ukuba amaqela ebhola ekhatywayo athelekiswe namhlanje umvulo umhla weshumi elinesixhenxe (17) kule yoMdumba inyanga ngentsimbi yesithandathu (18h00) kumagumbi e-Supersport.
Nanga amaqela ashiyekileyo, yi-Supersport United, iMamelodi Sundowns, iMarumo Gallands, i-Orlando Pirates, i-Stellenbosch, i-Kaizer Chiefs ne-Durban City.