Ibizizijwili, unxunguphalo emiphefumlweni yabazali nditsho nabahlali abebezimase inkonzo yokugqibela yamaxhoba aselula abhubhe kwindawo yentselo yasenyobeni kwiveki ephelileyo.
Izolo eSenary Park bekubanjwe inkonzo yokugqibela yabantwana, nebizinyaswe nguMongameli weli uCyril Ramaposa ekhatshwa sisigqeba sakhe esiquka iNkulumbuso uOscar Lubabalo Mabuyane, uBheki Cele kunye noZizi Kodwa ukubalula.
Ngethuba umongameli esenza intetho yakhe kulenkonzo ugxeke kabukhali ukuthengiswa kotywala, buthengiselwa abantwana abaselula, ekwathi lowo ufunyenwe esenza oko malivalwe ishishini lakhe. Uthi noRhulumente, abazali nasekuhlaleni likhona ityala ngenxa yalenyhikityha.
Ngabantwana abangamashumi amabini ananye(21) ababhubhe kwindawo yentselo eseSenary Park. Isizathu sokubhubha kwabo sisephantsi kophando, nanjengoko inkonzo yesipolisa ingekayikhuphi ingxelo epheleleyo.