IQela leQakamba lamaGqiyazana oMzantsi Afrika iProteas libethe iqela leqakamba lamanina aseNgilane ngoothinti abathandathu lincedwa ngabadlali abafana noDe Klerk kwakunye noWolvaardt abalikhokelele empumelelweni izolo, lo mdlalo wosuku olunye wamazwe ngamazwe kwiqakamba labasegoqweni ubudlalelwa kumabala iDiamond Oval kwelaseKirmberly kwiphondo iNorthern Cape.
Ngumdlalo wokuqala lona wangoLwesithathu izolo umhla wesine (04) kwinyanga yoMnga. Lo mdlalo ngowokuqala kwimidlalo emithathu ezakudlalwa ngalamaqela mabini. Iqela lamanina oMzantsi batywatyushwe imidlalo yomithathu kwimidlalo ye-T20I ebebesanda kuyidlala kweli loMzantsi Afrika.
ULaura Wolvaardt ukhokele ngomzekelo kulomdlalo njengenkokheli yeliqela leProteas lamanina encediswa nguNadine De Klerk. UWolvaardt ibingamashumi amahlanu (50) akhe emitsi awenza isihlandlo samashumi amathathu anesithathu (33rd) kulomdlalo wamazwe ngamazwe wosuku olunye ngethuba eqhokra amashumi amahlanu anethoba (59) emitsi ejongene neebhola ezilikhulu elineshumi elinesine (114) ephuma exwaye uphini lakhe wabe eqhokre nee’Boundary ezisixhenxe (7).
UNatalie Derckson uncedise uKapteni kubambiswano kuthinti wesithathu ngethuba bedibanisa noWolvaardt amashumi amahlanu anesibhozo (58) be bobabini apho uNatalie eqhokre amashumi amabini anesixhenxe (27) ejongene neebhola ezingamashumi amane (40).
UDe Klerk yena uqhokre amashumi amahlanu anesithathu (53) emitsi kwiibhola ezingamashumi amathathu anethoba (39).
UMzantsi uphumelele kusashiyeke imijikelo elishumi elinanye neebhola ezine (11.4).
INgilane yamagqiyazana iqhoke kuqala isenza ikhulu elinanashumi asibhozo anesithandathu iphuma yonke (186), waphendula uMzantsi wamanina wenza ikhulu elinamashumi asibhozo anethoba iphulukene noothinti abane (189/4).