Isibini kunye nomnqolobi bagwetywe oodilika-jele ngoba ngababulali baseKaladokhwe.
INkundla ephakamileyo yoMzantsi Afrika, kwiCandelo leMpuma Koloni, eMakhanda, kwndawo yaseNxuba (ebifudula isaziwa njenge-Cradock) igwebe uZizipho Pani (34), umyeni wakhe uSiyathemba James (39), isizalwana sakhe noSinethemba Pani (34) kwakunye noSizwesethu Jonas (34), isigwebo sobomi kunye neminyaka elishumi elinesihlanu (15) ngenxa yendima yabo ekubulaleni isoka lowasetyhini, esi sibini sasibathathele i-inshorensi yobomi, kunye nenzame yokubulala owasetyhini. Iqabane labo uMasixole Sokoyi (19) nobemncinci ngethuba kuqhutywa amatyala, ugwetywe iminyaka engamashumi amabini anesihlanu entolongweni, ngelokubulala, ukuzama ukubulala nokudlwengula lo wasetyhini.
Phambi kokwenziwa kwala matyala, esi sibini sasiqashe ixhoba elihlala kwisitalato esinye naso kwindawo yaseLingelihle kwisithili saseNxuba. Ungqondongqondo, uZizipho Pani, wathatha ipolisi yomngcwabo ngobomi bexhoba, kwibhanki ezimbini ezahlukeneyo, kwiBhanki yaseStandard kunye ne-ABSA ngo-2021, ezakuhlawulwa i-R200 000 ngokubhubha kwexhoba.
UZizipho Pani ze wacela iinkonzo zamadoda anqolobayo ebathembisa ngemali engange-R50 000 ukuba babulale ixhoba, elahlala nesoka lakhe kwikhaya lesoka. Ngobusuku bomhla weshumi (10) kweyeDwarha ka-2022, la madoda aye kwikhaya lamaxhoba apho ankqonkqoza ze avulelwa ukuba angene ngoba ayesaziwa ngawo omabini amaxhoba. Emva bahlaba esi sibini ngocelemba kunye neemela. USokoyi wadlwengula ixhoba, ze babashiya becinga ukuba babhubhile bobabini.
Nangona kunjalo, le nkosikazi yakwazi ukurhubuluza isiya kubamelwane iyocela uncedo, kwabizwa i-Ambhulensi, ixhoba lesibini labhubhela kwindawo yexhwyelo. Ixhoba lakwazi ukuxela ukuba ngoobani abahlaseli bakhe.
Kuvakala uZizipho nomyeni wakhe bathatha abatyholwa babasa exhweleni esikwindawo ekufuphi yaseCookhouse. Abatyholwa aba baafunyanwa ze barhangqwa ngabahlali becofwacofwa kodwa bahlanguleka kukufika kwamapolisa, ze babanjwa.
Umphathi wezoTshutshiso eMpuma Koloni uBarry Madolo uncome umtshutshisi kunye negosa lophando esithi, “Ayinakuze igxininiswe kakhulu indlela obubaluleke ngayo ubomi bomntu kungoko siza kuzimisela ekulandeleni la matyala ukuze sibe sisithintelo sesi sehlo sinje.”