By Esona Magawana
Ikomishini yamaLungelo oLuntu yoMzantsi Afrika (SAHRC) iza kukhupha ngoLwesine ingxelo ejonge ukusetyenziswa kwembumbulu ngexesha loqhanqalazo lwabafundi kwiDyunivesithi iWalter Sisulu (WSU) eMpuma Koloni.
Le komishini iqalise uphando emva kokubulawa komfundi uSisonke Mbolekwa. UMbolekwa wadutyulwa wabhubha kwikhampasi yaseMthatha ebutsheni balo nyaka. Kubanjwe umanejala wendawo yokuhlala eWSU ngesi senzo sokubulala. I-SAHRC yaseMpuma Koloni iza kukhupha iziphumo zengxelo yayo kuqhanqalazo lwaseWSU nalapho kusetyenziswe iimbumbulu kubafundi abaqhanqalazayo.
UMbolekwa noSethu Ndamase badutyulwa ekhampasini ngoTshazimpuzi walo nyaka,ngelixa uNdamase wasinda wachacha esibhedlele, uMbolekwa akazange asinde.
Umphathi wendawo yokuhlala uManelisi Mampane ubekwe ityala lokubulala kunye nokuzama ukubulala kulo mba. Ingxelo yale komishoni iza kuchaza iziganeko ezingqonge olu qhanqalazo, kuquka ukuqatsela kwesi siganeko kunye nokusabela kwabomthetho, phakathi kwezinye izinto. Ithi izindululo zayo zijolise ekomelezeni ukuphendula nokuphucula indlela yokujongana noqhanqalazo kwiindawo zemfundo ephakamileyo.