IZimbabwe ayilazanga elidlalayo ngethuba iqubisene neqela laseMzantsi lesizwe lebhola ekhatywayo iBafana Bafana.
Iqela lebhola ekhatywayo leeWarriors beliqubisene neBafana Bafana eBloemfontein kwiphondo laseFreystata ngoLwesibini umhla weshumi elinanye kule yeSilimela inyanga 2024.
Kwinkundla yezemidlalo eBloemfontein apho ibizele imi ngeembambo, iqela laseMzantsi Afrika libethe kabuhlungu iiWarriors zaseZimbabwe ngamanqaku amathathu kwelinye (3-1).
Umdlali weMamelodi Sundowns uThapelo Morena nongene endaweni kaElias Mokwana kwisiqingatha sesibini ufake amanqaku amabini (2) kwisiqingatha sesibini enceda iqela leBafana ukuba liphumelele umdlalo ngendlela engathandabuzekiyo. Lamaqela mabini (2) ebentanganye kwisiqingatha sokuqala somdlalo ngenqaku elinye macala (1-1).
Inqaku lokuqala lomdlalo ibe ngaBafana Bafana abophise kuqala ngenqaku elifakwe ngumdlali weStellenbosch FC uIqraam Rayners kwimizuzwana nje engamashumi amathathu anesihlanu (35sec) uqalile umdlalo, nalapho iBafana iye yankqenkqeza phambili ngenqaku elinye eqandeni (1-0).
Zibuyile iiWarriors zaphendula kumzuzu wesibini umdlalo uqalile kwakwisiqingatha sokuqala zatsho zantanganye ngenqaku macala (1-1) ngenyawo likaTawanda Chiwera, lomdlali wazalelwa kwelaseNgilane kodwa ukhethe ukudlalela iZimbabwe.
Kwakolu luhlu linguC, iRwanda ibindwndwele iLesotho kumabala iFNB nalapho iRwanda iphumelele ngenqaku elinye eqandeni (1-0). IBenin nebihlinzeke umdlalo ibethe ngamanqaku amabini kwelinye iiSuper Eagles zaseNigeria.
Kungoku nje iRwanda ihleli kwindawo yokuqala (1) ishiya iBafana ngamanqaku nehleli kwindawo yesibini.
By Siphiwo Boqwana