Abanjwe ngobhongwana AmaTuks phezolo ngaBakgakga.
Ibe yinkwa nenkwa kumaqela anethemba lokufumana ukonyuselwa ukuya kwiPSL emva komdlalo waphezolo kwiphondo laseLimpopo.
IBaroka ayivumanga kwaphela ukuwa emva kokubambana ngobhonqwana namaTuks ngenqaku macala (1-1) phezolo umhla weshumi elinesibini (12) kweyeSilimela. Ukhumbule ukuba eli qela leBaroka ligxothe umqeqeshi obazise kolukhuphiswano uDan Malesela ze yaqesha uMorgan Mammila nowagxothwa kwiqela leChippa United.
Lo mdlalo ubudlalelwa kwiphondo laseLimpopo kumabala iGlobal. IBaroka yaphulukana nomdlalo wokuqala kulemidlalo ngethuba ibethwa ngenqaku elinye eqandeni (1-0) ibethwa ngamaTuks kumabala iTuks ePitoli, lonto yenza ukuba anikwe uphumaphele umqeqeshi.
Kumdlalo wakhe wokuqala umqeqeshi uMorgan udlale ngokulingana neRichards Bay ngeqanda macala (0-0) kumabala iGlobal, eLimpopo. IiNatal Rich Boys zona zibethe iUniversity of Pretoria ngenqaku eqandeni (1-0) kumabala iKing Zwelithini eThekwini, ngomgqibelo umhla wesibhozo (08) kweyeSilimela kumdlalo wayo wokuqala.
ABakgakga baphoxe omabini amaqela kolukhuphiswano ngethuba edlala ngokulingana.
IRichards Bay ihleli kwindawo yokuqala nangona belingana ngamanqaku namaTuks ehleli kwindawo yesibini ize iBaroka engekaphumeleli ibesemsileni kwindawo yesithathu.
By Siphiwo Boqwana