UNwabali ulandisile ixesha azakulichitha kwiqela lebhola ekhatywayo eGqeberha.
IChippa United neMamelodi Sundowns bavumelene ngomdlali wangasemva nodlala ekhohlo uGadinkame Modise noneminyaka engamashumi amabini anesihlanu ubudala nobekwimbolekiso kweliqela laseGqeberha. Kungoku nje utyikitye neeChilli Boys ngokupheleleyo.
UModise udlale imidlalo elishumi elinesixhenxe kweliqela leChippa kwisizini edlulileyo. Lomdlali utyikitye neChippa United iminyaka emithathu emva kwezivumelwano phakathi kukaMpengesi nabaphathi beSundowns.
Kungoku nje uGadinkame uyathutha iintente zakhe uzokuzimilisela eGqeberha esuka ePitoli.
Kwelinye icala unozinti waseNigeria uStanely Nwabali weChippa United uphinde wazinikela kweliqela ngokuthi alongeze ngeminyaka emithathu ixesha azakulichitha neliqela. UNwabali wenziwe inkokheli yabadlali beliqela laseMpuma Koloni.
UStanely unconywe etyibelwa ngegalelo lakhe nendlela azinikele ngayo kweliqela kwakunye nokuthembakala enconywa nguSiviwe Mpengesi weliqela.
By Siphiwo Boqwana