Umongameli uCyril Ramaphosa uthi ukuma koMzantsi Afrika kumgaqo-nkqubo wezangaphandle ukusukela oko kwangena inkululeko kwenze ukuba ube liqabane elithembekileyo kwezozakuzo.
Ebethetha nesizwe, phambi kweNgqungquthela ye-15 ye-BRICS, neza kuqhuba ngoLwesibini eSandton, kumantla eRhawuti. Uphinde wahlaba ikhwelo leBRICS kulungelelwaniso lwehlabathi olubandakanyayo. Ukusingatha koMzantsi Afrika le ngqungquthela kuxhokonxe umsindo kumaqabane awo ehlabathi ngenxa yokungakhethi cala kwawo kungquzulwano lwaseRussia-Ukraine.
URamaphosa uthe le ngqungquthela ikhethekileyo yeBRICS ibalulekile. Esithi I-BRICS njengombutho idlala indima ebalulekileyo kwihlabathi ngenxa yamandla ayo kwezoqoqosho, kwimarike, impembelelo yezopolitiko nentsebenziswano kuphuhliso. URamaphosa uthi Amazwe e-BRICS ngokudibeneyo angabumba iinguqu zehlabathi, kwaye asebenze kunye, anamandla okuqhuba utshintsho olubalulekileyo kuqoqosho lwehlabathi kunye nobudlelwane bamazwe ngamazwe.
Ethetha ngotyelelo lwasebuRhulumenteni kunye nokuzimasa iNgqungquthela ye-BRICS ngoMongameli uXi Jinping waseChina, uMongameli Ramaphosa uthi i-China noMzantsi Afrika bazimisele ukutyikitya izivumelwano ezininzi.